في دايرة الرحلة (13) : فلنذهب لكأس العالم !

آخر تحديث: الجمعة 18 أبريل 2014 - 11:00 ص بتوقيت القاهرة

الحلم !، تخيل انك تروح البرازيل في كأس العالم!

أمريكا اللاتينية بشكل عام قارة مميزة جدا، السامبا، التانجو، ميسي، رونالدو، كابتن فواز، لولا دا سيلفا، مهرجان دي جانيرو، شاكيرا، وأخيرا كاس العالم!

البرازيل مش من البلدان الي بتفكر تزورها كل يوم لأن تكلفة السفر الطبيعية للبرازيل في أي وقت عالية جدا، الطبيعي انت بتتكلم في من 14- 17 ألف جنيه طيران !، وتخيل بقى كمان في كاس العام !

طب إيه رأيك بقى إن انت ممكن بشوية تعب كدا، تروح البرازيل في كاس العالم بتكلفة حوالي 8500 رايح جي؟ آه والله زمبؤلك كدا...

 

طيب عشان نبقى على نور من البداية ، الطلعة دي هتكون مغامرة حقيقية، وهنتشقلب فيها مع بعضينا، فنصيحتي الأولى انكم تطلعوا مجموعة مش فرد واحد عشان القصة دي تمشي كويس، طبعا المشكلة الكبيرة هي تذاكر الطيران، تعالى نشوف مع بعض الـ3 اختيارات اللي قدامنا وطبعا فيه حاجات أريح من حاجات بس أغلى شوية وفيه واحدة بالنسبة لي أنا روعة وأنا أفضلها.

صحتك حلوة؟ يالا بينا...

الاختيار الأول:

مسارك فيها هيكون كالتالي:

-هتطلع من شرم الشيخ على ميلان (اه ماتتخضش هنروح ايطاليا الأول)

توصل ميلان، ننبسطلنا في إيطاليا يومين و ننطلق إلى المطار يوم 9 (هنتكلم في موضوع هنبات فين دا بعدين).

طبعا زي ما انت ملاحظ احنا طالعين هنقف في لشبونة 11 ساعة، اختياراتك كتيرة بقى، بين انك تنام في المطار (آه على فكره دا اختيار)، أو انك تشوف مكان قريب تاخد فيه ليلة وتنزل الصبح بدري، أو تقضيها سنكحة مع صحابك الـ11 ساعة دول.

رجعنا ميلان؟ جميل..

نقضي يوم ونبات هناك وتاني يوم نرجع على شرم..

يعني التكلفة الإجمالية: 8700

طيب في الفترة دي إيه الماتشات اللي هتتلعب؟

بالنسبة لـ«ساوباولو» اللي هتبقى فيها ماتش واحد هو ماتش الافتتاح.

وباقي الماتشات في مدن مختلفة في البرازيل ممكن بقى تاخد باصات أو طيران داخلي (للأسف البرازيل كبيرة جدا!)..

وبشكل عام دا لينك فيه ماتشات كأس العالم كلها والمدن اللي مستضيفاها.

طيب دي أول علقة...

الاختيار التاني:

ودا مغامرة حقيقية وعجباني جدا جدا الصراحة، هنبدأ من القاهرة لساوبالو (رحلة رايح جي) :

بس أكيد خدت بالك إن رايح 60 ساعة وراجع 42 !..

تعالى نبص على التفاصيل الممتعة:

دي حلاوة الرحلة، عندي يا ريس ترانزيت يوم كامل تقريبا في روما ويوم زيه في لشبونة، وفي طريق الرجوع يوم كمان في لشبونة، يعني كومبو 3 دول في سفرية واحدة ومن غير ما تحتاج أي فيزا إضافية.

لو معايا فلوس وأعرف آخد أجازة هطلع الرحلة دي وش!.

طيب في المدة دي إيه الماتشات الموجودة في ساو باولو:

والمدن زي ما وريتكم فوق بقى..

أكيد ملاحظ طبعا ان المدة مش طويلة في الإقامة هناك، بس عادي لو عايز مدة طويلة هتلاقي برده في حدود نفس التكلفة من ميلان مثلا:

الاختيار التالت:

إنك تطلع من شرم لميلان برده:

نريح يومين فسحة في ميلان وبعدين يوم 12 نطلع على مدينة Fortaleza في البرازيل:

خلصنا ورجعنا، يومين كمان في ايطاليا ونرجع من ميلان لشرم تاني.

يعني تكلفة إجمالية حوالي 7000 جنيه يا برنس الليالي.

مدينة "فورتاليزا" دي شكلها غريب ومش مشهور طبعا لكن هي من المدن اللي هتستضيف ماتشات كاس العالم وفي مدة السفر اللي في الرحلة دي فيه:

وبشكل عام دي المدن المستضيفة لكأس العالم:

وفيت بوعدي الأولاني؟

طيب فيه حتة لسة ناقصة، التنقل الداخلي بين المدن في البرازيل؟

عندك برده كذا اختيار، فيه الطيران:

لكن نصيحتي ليك اللي جمعتها من شهادات كتيرة؟ أصبر للحظات الاخيرة وهتلاقي سعر التذكرة نزل النص والربع أحيانا !

وعندك الاختيار التاني انك تسافر بالباص، و شبكة الباصات الداخلية في البرازيل ممتازة، بتطلع من محطات زي السوبر جيت عندنا اسمها rodoviária ، والأسعار standard فمفيش لعب كتير، تمن الرحلة من ساوباولو لريو دي جانيرو حوالي 80 ريال برازيلي يعني حوالي 250 جنيه تقريبا.

وممكن طبعا تتهور وتأجر عربية وتعيش حياتك بقى، بس اعمل حسابك، السواقين هناك في نفس مستوى سواقين المكروباص هنا من حيث التهور. انت وكيفك بقى.

وبالنسبة للاقامة لو مسافرين مجموعة انصحك تشوفوا AirbNb عشان الهوستلز هتبقى مليانة وغالية جدا والأوتيلات كمان، لو انتوا 4 ممكن الاقامة تقف على الواحد بـ 50 يورو في الليلة.

الحقيقة ممكن أقل، 25 يورو كمان:

يعني تكلفة إقامة 5 أيام حوالي 1300 جنيه مثلا:

يعني ممكن نقول يا سيدي إن تكلفة وجودك هناك لو شلنا منها الأكل والشرب والطيران الداخلي لو ناوي، تبقى داخلة في 9 أو 10 آلاف جنيه لو هتقعد 5-6 ايام.

في حين ان تذكرة الطيران العادية جدا بـ15 اصلا:

وبالنسبة للاقامة في إيطاليا ولشبونة بقى زي ما علمتكم في المقالات اللي فاتت شوفو هوستل كويس..

وأحب انهي المقال دا بـ اللينك دا، واحد من أروع الـtravel guides اللي لقيتها أونلاين عن البرازيل، هيعجبكم اوي!

وسعوا آفاقكم، كل حاجه ممكنة.

تابعوني على نوّرني:

http://www.facebook.com/nawarny11

تابعوني على فيسبوك:

http://www.facebook.com/ze3r0