الانترنت بقى من أهم الحاجات في حياتنا كلنا، خاصة بقى وانت مسافر !، بتبقى عايز تشارك لحظة حلوة مع الناس كلها، أو محتاج تستخدم Google Maps عشان تعرف مكان ما. بتحتاج تتصل بأهلك تطمنهم عليك لكن المكالمات الدولية غالية والانترنت سواء سكايب أو فايبر بدائل رخيصة ورائعة لكن عايزة انترنت!. مش بس كدا، ممكن أحيانا الانترنت ينقذ حياتك لو تايه ومعندكش وسيلة اتصال تانية!
النهارده هقولك ازاي يبقى معاك انترنت طول الوقت وانت مسافر، وبأرخص تكلفة ممكنة...
ايه اختياراتك؟
نجيب انترنت منين بقى؟ بص يا سيدي، عندك اختيارين للانترنت وانت مسافر (لو دوّرت أونلاين هتلاقي حاجات تانية كتير، بس صدقني، دول الـ2 العمليين) :
- واي فاي مجاني (كنتاكي - ماك - ستار بكس)
- انك تشتري خط و خطة داتا من البلد اللي انت مسافرها
الواي فاي المجاني:
طبعا دا الاختيار الأفضل لينا كلنا، ليه؟.. لأنه مجاني طبعا! طيب نجيبه منين بقى الواي فاي المجاني دا؟
بص يا سيدي، دي قائمة بأشهر 10 أماكن ممكن تلاقي فيهم واي فاي مجاني:
ماكدونالدز وكنتاكي وستار بكس
سلسلة Barnes and Noble كلها.
المكتبات العامة
وانت بتحجز «هوستل» أو «أوتيل» أو «غرفة»، اتأكد ان فيه واي فاي مجاني فيهم واتأكد من الريفيوهات إنه سليم.
بونص: دا دليل لكل سلاسل الاوتيلات اللي بتقدم خدمة انترنت مجاني.
«دور على علامة الفري واي فاي في الكافيهات والمطاعم وهتلاقيها كتير»
طيب كل دا جميل .. بس مش كافي، ومش هكتب مقال عشان أقولك روح دور على ماكدونالدز يعني!..
فيه وسيلة تكنولوجية بقى!
أقدملك صديقنا العزيز Wefi:
ودي عبارة عن برنامج عبقري على السمارت فون والويندوز، عبارة عن قاعدة بيانات عملاقة لشبكات الواي فاي المجانية حول العالم. بتنزل البرنامج على موبايلك أو من جهاز الكمبيوتر بتاعك وبتفتحه وبتحدد مكانك على الخريطة أو بالجي بي إس، يقولك أقرب واي فاي مجانية ليك فين وتروح ازاي!
Wefi شبكة فيها فوق الـ200 مليون free wifi hotspots ودا لينك برنامج الاندرويد ولينك برنامج الوندوز ولينك الآيفون كمان.
وده مش البرنامج الوحيد، فيه كمان برامج كويسة زي:
WiFinder وHotspot Haven وJiWire(آيفون) وWi-Fi Hotspot List وHotspotr
وكلها وسايل ممتازة عشان تلاقي واي فاي مجاني..
لو عندك استعداد بقى تدفع شوية فلوس صغيرة (خاصة لو بلد هتقعد فيها شوية اسبوع مثلا أو اكتر حتى لو في مدن مختلفة)
دا حل انا بفضله شخصيا رغم ان فيه شوية تكلفة وهو:
اشتري sim card محلية و اشترك في Data plan!.
دا حل لطيف، وبشكل عام التكلفة المتوسطة ليه حوالي 10 - 20 يورو بالكتير حسب البلد وبداتا بلان حوالي 2 جيجا مثلا.
طبعا قبل ما تسافر لازم تبقى محدد ناوي تجيب خط من شركة إيه والـdata plans اللي موجودة.
للأسف مفيش مواقع بتعمل الليلة دي، فلازم تسيرش على النت، ودايما هتلاقي مقال بيتكلم عن الموضوع متقلقش:
ودا مقال ممتاز لقيته بيتكلم عن إيه أفضل شركات الاتصالات وأرخص العروض في أشهر بلاد أوروبا.
ولو خلاص بقى يائس أوي وكل دا منفعش، مفيش بقى غير إنك تـ Hack شبكات الواي فاي اللي حواليك وخلاص!
ودول بينقسموا لنوعين في الحماية، الـWPA والـWEP. هنا مقال عن إزاي تكسر شبكة WEP ودا عن الـWPA
بس طبعا أحب أنبهك إن دا فعل غير قانوني ولا أخلاقي واستخدام المعلومات اللي في المقالين دول (اللي هي مكتوبة لأغراض تعليمية زي ما كلنا عارفين) مسؤوليتك الشخصية، دا غير انها بتحتاج مهارات متقدمة عشان تعرف تعملها، والهدف الوحيد من عرضها هنا هو التسلية وإن المقال يبقى حرفيا جاب كل الوسائل الممكنة. Use it on your own responsibility
بس خلاص ...
تابعوني على نوّرني:
http://www.facebook.com/nawarny11
تابعوني على فيسبوك:
http://www.facebook.com/ze3r0