اتكلمنا المرة اللي فاتت عن إزاي تختار «هوستل» كويس للإقامة وانت مسافر، وإزاي تلاقي أوضة بسعر تمام ونضيفة، طيب هنتكلم النهاردة بقى عن مستوى تاني من الإقامة وهو الإيجار، بالتحديد موقع airbnb اللي كلمتكم عنه قبل كدا، هنعرف إزاي نأجر أوضة في شقة أو شقة من بابها وتكاليف دا إيه وإزاي وكدا، وبالمناسبة الحل دا مش بس متصنف حل أغلى من الهوستل، ممكن جدا يبقى بشكل ما أرخص من «الهوستلز».. هوريكم إزاي برده...

معايير الاختيار

طيب هنمشي زي ما مشينا في المقال اللي فات، وهنتكلم عن المعايير المهمة اللي على أساسها بنحدد، بس هنا الموضوع أبسط وأسهل شوية:

-ميزانيتك

-المميزات الأساسية ليك

-المكان

-التقييمات والريفيوز

-الأمن

هنبدأ سوا نفتح Airbnb.com و نشوف الليلة دي ماشية ازاي..

اول ما تبدأ بحث هتلاقي قدامك صفحة النتايج 4 أجزاء، شمالك الخريطة وعليها الأماكن، يمينك بالترتيب من فوق التاريخ اللي مسافر فيه، وتحته نوع الغرفة و تحته متوسط السعر و تحتهم الأماكن وصورهم (وفيه More filters دي لفلترة المميزات)

الميزانية:

الميزانية هنا هي المحدد الأكبر يا بوب، فهقف هنا دقيقة بقى وأقولك شوية معلومات ونصايح:

بص، ميزة إيجار الغرف أو الشقق ان «العدد في اللمون»، يعني انت بتدفع إيجار الأوضة أو الشقة وخلاص، مش فارقه انتوا كام (بس طبعا الأوضة أو الشقة الراجل محدد limit للعدد المسموح يبقوا فيها ومكتوب)، فعادة لو عدد،airbnb ممكن يبقى أرخصلك من الهوستل.

لو عايز تضرب إقامة رخيصة في حاجه زي دي ايجار وطبعا مستوى أريح من الهوستل، أبعد شوية، يعني بص كدا على الخريطة دي:

فلورنسا في القلب أهو، بص فوق على الشمال مدينة براتو، دي مدينة صغيرة على مسافة 40 دقيقة بالباص، وأنا مسافر أجرت أوضة هناك، وأوضة نضيفة جدا، بـ20 يورو في اليوم لفردين!، عشان مش مدينة مشهورة، وكنت بنزل أركب باص بـ 2 يورو رايح وزيهم جي يعني ضيفهم على الأوضة كأني قاعد بـ14 يورو في اليوم الواحد في الأوضة دي (الصورة اللي في أول المقال هي صورة الأوضة اللي كنا فيها)...

يا بلاش!.

فميزانيتك هتفرق كتير في تحديد انت هتدور ازاي على مكان، لأن تعالى ناخد الناحية التانية، انت مسافر مع مراتك تتفسحوا، أو شهر عسل او بنات صحاب وميزانيتهم كويسة ، هتبص بشكل تاني، هتبقى عايز حاجه زي دي مثلا:

شقة بـ100 يورو في اليوم مثلا، أنا مفترض هنا انه 3 بنات صحاب مثلا مسافرين فينيسيا كل واحده هتدفع 30 يورو في اليوم وشقة في قلب فينيسيا (اللي هي أصلا غالية جدا) وبراحتهم..

فنصيحتي الأولى وانت بتدور، الخانة بتاع الفلوس دا حدده واعرف انت عامل حسابك هتدفع كام، ومتنساش لو انتوا أكتر من شخص انك تضرب ميزانية الواحد في اليوم في عددكم عشان تعرف انت كدا معاك حوالي أد ايه لليوم الواحد.

ملحوظة: دور على أقل شوية من ميزانيتك لان airbnb ليها fees، مش فاكر بتتحسب إزاي بس هتلاقيها مكتوبة.

بونص هدية: جرب تكلم الراجل أو تبعتله وتتفاوض معاه، ممكن يوافق وتنزل السعر عن اللي مكتوب أو حتى تخلص معاه برا بعيد عن الموقع فتوفر على الأقل تكاليف الموقع.

كدا انت ابتديتوا تفهموا اللعبة، بعد ما تكتب المدينة، اختار من خانة السعر المتوسط بتاعك وعدد المسافرين و في أنواع الأوض اختار اللي على مزاجك، أنا مثلا بدور في روما هنا، محدد متوسط سعر 60 في الليلة (فهختار 55) وأوض خاصة أو شقق أو حتى shared rooms مع ناس تانية مش فارقة معايا:

المميزات:

بس لقيت قدامي 515 اختيار، فكويس كدا، فيه مساحة للتقليل، واللعب، هخش على more filters واختار الحاجات اللي تهمني أوي:

طبعا دي تختلف من شخص للتاني، بالنسبة لي اخترت أهم حاجات:

«انترنت وان المضيف يكون بيتكلم عربي أو انجليزي أو الماني».

اختار انت الملائم ليك بقى، ممكن تكون عايز نوع معين من الشقق، عايز تكييف، أو دفاية أو أي حاجه بقى..

الاختيارات كتيرة.

المكان:

المفروض في المرحلة دي تبدأ تطلع اختيارات بقى، يعني انا دلوقتي قدامي بتاع 13 اختار منهم، فانا بالنظر على الخريطة كنت بدوس على الاماكن القريبة من قلب المدينة واخترت ال5 الاقرب في تقديري ، دي اول طريقة فلترة

الطريقة التانية بصراحه كان اني بسكرول واتفرج على الاختيارات والحاجات الي شكلها عاجبني باختارهم.

بس تاخد بالك اوي وانت بتختار اي مكان بتقف عليه بيوريك فين، متروحش بعيد اوي (طبعا حسب حسبتك)

بس نصيحتي متروحش بعيد اوي في المدن الكبيرة، في المدن الصغيرة مش مشكلة..

طيب الفلترة الاولانية حسب المكان بقى انك تاخد لفة سريعة على ال5-6 الي اخترتهم وتقرا الـdescription:

عادة هتلاقي معلومات عن المواصلات القريبة للمكان وكدا، بس لو مفيش، افتح صديقك Google Maps وشوف المسافة بين العنوان اللي مكتوب و وسط البلد (محطة المترو الرئيسية):

التقييم العام:

انك تفتح بقى مكان من اللي اخترتهم وتقيمه بشكل عام عايز انك تاخد بالك من كام نقطة مهمة:

- بص كويس على الصور وقلب في المكان وشوفه مناسب وعاجبك ولا إيه النظام.

- تفاصيل الشرح اقراها كويس وافهمها.

- «الريفيوز» مهمة جدا جدا، هتلاقي عادة ريفيوز تحت المكان، كل ما كان فيه ريفيوز أكتر معناها المكان أكثر أمانا وتقدر تاخد فكرة أفضل عن المكان.

فبشكل عام ابعد عن اللي ملهمش ريفيوز خالص، بس في نفس الوقت خلي بالك، بيبقى أسهل تنزل في السعر مع اللي ملهمش ريفيوز لأنه عايز ناس تجيله عشان بروفايله يعلى، فيها سنة مخاطرة، بتاعتك بقى ولتقديرك.

-كمان مرة، اقرأ كويس الريفيوز، عادة الريفيوز بتوضح أوي مستوى المكان ومسافته وراحته.

- آخر حاجه بقى، افتح بص على «الهوست» نفسه وشوف بروفايله كويس وقيمه.

عدد الريفيوهات وكلام الناس، وعلى الشمال هتلاقي verifications معناها ان البيانات اللي عليها صح، دي تم تأكيدها بواسطة الموقع وانها حقيقية وشئ ممتاز لو لقيت فيسبوك أو نمرة كلها تأكيدات على ان الشخص حقيقي.

الأمن:

طبعا انا عارف كالعادة الناس بتخاف تجرب، أنا متفهم دا كويس بس خلي بالك هو برده مدخلك بيته وهو ميعرفكش، في النهاية المخاطرة محدودة، الموقع بيأكد البيانات وبيقولك إيه المؤكد، اقرأ كويس وقيّم البروفايل كويس وحاول تتصل بالشخص لغاية ما ترتاحله، بس طبعا حرص وخد بالك لأن مفيش حاجه مضمونة.

تجربتي مع Airbnb بشكل شخصي كانت عظيمة جدا، ونصيحتي ليك لو جربته، بعد ما تمشي متنساش تدخل على الموقع وتضيف ريفيو وتساهم في إنك تساعد المسافرين بعدك انهم يعرفوا انطباعك عن المكان اللي رحته عشان تفضل الحلقة دايرة وكلنا بنستفيد، واخيرا نصيحتي الاخيرة، اتأكد ان صاحب المكان عنده أو معندوش Pets وشوف مدى احتمالك لدا، لاني اتروقت بسبب وجود «ليونايدس» الكلب بتاع أليكس في فلورنسا، وأنا بخاف من الكلاب الحقيقة، فخد بالك..

تابعوني على نوّرني:

http://www.nawarny.com

تابعوني على فيسبوك:

http://www.facebook.com/ze3r0

تابعوني على تويتر:

http://www.twitter.com/NourEldin_z3r0