كش ملك
كش ملك
هيموت الملك
ويبقى حمدين الملك
كش ملك
ولو كل اللي في المملكة هلك
كش ملك
فيها إيه لو عرض كام بت انتهك
كش ملك
ولو كل شئ اتنهب و اتسرق
كش ملك
لحظة سكون
ده عاقل ده ولا المجنون
الملك و اللي بيكشكشوه من نفس اللون
وكلهم عساكر
والنخبة واقفة في الآخر
بينها وبين بعض مساخر
كله بيقول للتاني ما تتاخر
انت إيه جابك يا فاجر
وسايبين الملك مسجون
متحاصر حصار ملعون
ولا حد مد له إيد العون
أصل الوزير ما بيردش علي التليفون
والطابيه معاها تليفون
والفيل بيصور للتليفزيون
كلهم سابوه وباعوه ورموه
وفي إيده يرميهم في السجون
وساعتها تقولوا عليه نيرون
طاغية وفرعون
فيه دكتاتور
يهجموا على قصره بالمولوتوف والساطور
وكل اللي يعمله.. يعلي السور؟!ّ
لو كان دكتاتور
كان وقفهم طابور
وضرب عليهم بالدور
واللي يرحمه
يلاقوه منحور
تلات كشات
الملك عايش ولا مات
نروح للقضا بهتافات
لو حكمت لغيرنا هنوقف المواصلات
ونبدأ الإضرابات
وأي بلطجي أو شقي
يجي وهيلاقي الجيب سخي
ونعمله بلاك بلوك
ويهجم علي البنوك
وبعد ما كان صعلوك
هيبقى بطل، ولو مات يبقى شهيد مبروك
حتى الدعاء للملك مستكترين
لو دعينا نبقى متأخونين
متأسلمين
بس متخفين
طب ندعي لمين؟
يحفظه من كل عين
ويبعد عنه المفسدين
هو كره الإخوان خلانا عميانين؟
ومش شايفين خير بلدنا فين؟
يهجم شاب بيكبر
على جندي واقف بيستغفر
واقف وعنيه بتدور
على لقمة عليها يتسحر
وعسكري واقف قريب
عايز ينتقم لزميله الحبيب
اسمه عبدالصليب
يهجم على شاب مريب
كان حاطط إيده في جيبه
أتاري بيتبرك بالصليب
وواحد اتقتل أخوه
حلف قدام أبوه
ليجبب دم أخوه
عرف إن أخوه
كان في نفس المكان اللي كان فيه
لكن مع الفريق اللي هو وأصحابه ضربوه
وشاف فيديوهات لقتل أخوه
وازاي ضربو وسحلوه وشتموه
ورجع لأبوه
قاله انتقم لأخويا وقدامكوا جسمي
ارجموه
وطبقنا خطة نابليون
وضحينا بكام مليون
وضحينا بالملك والمملكة
وكذبنا كام كذبة متفبركة
عشان نفوز بالمعركة
مباراة اللي فايز فيها خسران
ويفيد بإيه المكسب
والشعب كله جعان؟!