- عايز بس أقولك ماتخافش.. شيل النظرة القلقانة دي من على وشك، ماهو دايماً الواحد لما حد يقوله عايزك في حاجة مهمة مايخطرش في باله إلا البلاوي بس.. متقلقش.
- مش هكلمك عن الثورة والألف ونص اللي ماتوا فيها، وزيهم اللي اتصابوا إصابات مزمنة تعوقهم عن ممارسة حياتهم بشكل طبيعي، وأضعافهم من المصابين في مختلف أجزاء جسمهم.. اهدى كده.
- ولا هكلمك عن أحداث محمد محمود ولا ماسبيرو ولا مجلس الوزراء ولا وزارة الداخلية ولا العباسية ولا حاجة من دي خالص. ولا هجيبلك سيرة حد انداس تحت مصفحات الجيش، ولا اترمى في الزبالة، ولا واحدة اتعرت وانتهكت كرامتها قدام العالم كله.. عارف إنك مش وش نكد يا بوب.
- متبصليش كده بس.. تكونش فاكرني هجيبلك سيرة اقتصادنا اللي وقع، ولا سياحتنا اللي ضاعت، ولا جيشنا اللي ساب شغله وبقى راشق في البلد، ولا داخليتنا اللي بقت استغفر الله العظيم، ولا وضعنا اللي بقى زي الزفت في الوطن العربي.. أبسلوتلي.
- يا عم ده كله كلام فاضي ووجع قلب.. إيه يخليني أكلمك عن الكام وسبعين واحد اللي اتقتلوا في استاد عشان حتة ماتش كورة مالوش لازمة يضيع أرواح شباب زي الورد.
- تخيل – بالمناسبة يعني – كل دول حقهم مرجعش ولا الهوا ولا شكله هيرجع أصلا.. ومع ذلك مش ده الموضوع اللي عايزك فيه.
- هششششششت قبل ما تتكلم.. مش جايبلك سيرة محاكمات، ولا موقعة جمل، ولا حسني ومبارك وإخلاء سبيله، ولا الحوار اللي يوجع القلب ده أصلا.. قشطة؟
- ولا الجنود المخطوفين والمقتولين ع الحدود ولا غيرهم.. فكك.
- طب أقولك الكبيرة بقى.. أنا مش هكلمك عن البلد اللي هتخرب ما بين اللي عايزين يكوشوا عليها ويحطوها في جيوبهم وبين اللي عايزين يولعوا في أي حاجة وخلاص.. وياكش البلد تولع.
- بقولك إيه.. أنا زهقت من كتر الحاجات اللي "مش هقولهالك"، أنا مش هجيبلك سيرة حاجة من الحاجات اللي ماتهمكش دي.. أنا هكلمك في موضوع مهم أوي.
- أيوه كده يا مان.. فك وشك كده.. عارف إن مزاجك اتعدل بعد ما أنا "ماقلتلكش حاجة".
- ندخل في الجد بقى.. هو صحيح الأهلي والزمالك في مجموعة واحدة في بطولة أفريقيا؟