«السيسي» يرد على مواطن طالبه بإزالة غرامات الفلاحين: «بناء الأوطان مش بالخواطر»

آخر تحديث: السبت 18 نوفمبر 2017 - 2:14 م بتوقيت القاهرة

أحمد العيسوي

رد الرئيس عبد الفتاح السيسي، على مواطن طلب منه إزالة الغرامات الواردة على الفلاحين نتيجة زراعة الأزر بالمخالفة، قائلًا: «لازم تكون عارف إن اللي بتتكلم عليهم هم أهلي وناسي زيك، بس لازم نعرف إن الأوطان لا تبنى بالخواطر ولكن بالالتزام والانضباط».

وأضاف «السيسي»، خلال افتتاحه مشروع الاستزراع السمكي ببركة غليون، السبت: «لسه بنتكلم بقالنا أسبوع عن مشكلة سد النهضة وبنقول المياه رايحة فين، ونحن لسنا ضد زراعة الأرز ولكن علشان حجم المياه المخصص للزراعة يكفينا، ولما نتجاوزه هيترتب عليه نقص المياه المتاحة لمصر، وهل دا لصالحنا؟».

وتابع: «كان ممكن يزرع حاجات اخرى طبقًا للمياه المتاحة، وكل اللي بطلبه إنك تساعدني وتنفذ التعليمات، ولما نقول نزرع كذا ألف فدان يبقى نزرع كذا ألف فدان بس»، مضيفًا: «إذا كنا عايزين نبقى دولة مستقرة ومفيش إشكاليات يبقى لازم تسمعوا كلامنا، لأن اللي حدث خلال السنوات اللي فات نتيجة تجاوز القواعد اللي بتنظم الدولة».

واستطرد: «لما نقول إن الأحوزة الزراعية لزراعة الأزر في مصر تبقى كذا ألف فدان أرجوا إن محدش يتجاوزها، لأن المياه المتاحة لكده بس، ونتيجة الناس اللي تجاوزت هنجيب المياه منين».

وأوضح أن زراعة الأرز بالمخالفة وبزيادة عن المطلوب هو تجاوز في حق مياه مصر وشعبها، مستطردًا: «الشعب بقى واعي وعارف إيه المضر والمفيد، كنت أتنمى تلبية المطلب ولكن لا أستطيع تلبية مطلب لا أمتلكه، لأن المياه دي مش بتاعتي دي بتاعتكم أنتم، والتجاوز دا مش في حقى أنا دا في حقكم أنتم».