قصيدة: كلمة

مش حزين
انى نسيتك.. واتنسيت
مش راح اندم
أو هقول مره يا ريت
مش راح احلم
انى جنبك.. أو على صدرك بكيت
ده إنتى «كلمه» جوه سطر
فى قلب صفحه من كتاب
الكتاب شايله فـ أيديه
مره بنساكى ومـــره
تنسى وتشوفك عنيه
مره أشوفك حرف «جر»
و«اعرب» «المجرور» وراكى
«كسرته» تصعب عليه
والتقيكى «حرف نصب»
تنصبى على أى «فاعل» تفتحيه
وتسيبيه على نار قويه
و«أنا» فاهمك
أصلى واخد درس من سابق «خواتك»
عارف إنك فى البداية
تيجى «ساكنه»
وانتى عارفه إن أنا بهوى «السكون»
مره تانيه تحطى «ضمه»
فوق عنيكى
تبعدى كل الظنون
وتدوّبّى قلبى الحنون
تتمسكنى.. وتتطمنى
«الضمه» تبقى «فاتحه» واسعه
فى العيون
و«الوصل» عندك يتحرق
والتقينى
بعد كل الحب ببقى «مبتدأ»
بس «الـخـبـــر»
انى بطول التجربه
اتعلمتكم وفهمتكم
ولما بقراكى فـ كتاب
أو لما أقرب «نحــوكم»
ببقى عارف «ضمتك» من «فتحتك»
يصعب عليه «كسرتك» انتى وصحابك
واطوى عليكى صفحتك
واحذف من الأيام كتابك