في السطور الجاية نشارك تجربتنا مع حمام التلات معاكي أنت عزيزتي، وفالموضوع ليس للرجال المرة دي.
العنوان.. إسألي عن أمير الجيوش
الطريق لحمام التلات يبدأ من محطة مترو باب الشعرية. خدي المترو من أي مكان وانزلي محطة “باب الشعرية”، اخرجي من المترو واسألي عن شارع أمير الجيوش اللي فيه الحمام، هتمشي حوالي 5 دقائق وهتوصلي للشارع اللي عبارة عن حارة ضيقة يمينها وشمالها محلات تجارية.
المهم، من بداية الشارع هتمشي تقريبا 5 دقائق كمان وهتلاقي على يمينك مبنى أثري رقمه 40، وعليه يافطة مكتوب عليها حمام البخار البلدي “مرجوش”.
ولا تسألي عن الحمام
حاولي تتبعي وصفة الطريق اللي قلنا عليها عشان توصلي بسهولة، ولو توهتي ومحتاجة تسألي على العنوان، بقدر الإمكان اسألي واحدة ست، وحاولي متسأليش أصحاب المحلات عن مكان الحمام، عشان متلاقيش نفسك وسط زفة بلدي بتغني لك “يا خارجة من باب الحمام وكل خد عليه خوخة”، وعشان كده اتأكدي كويس قبل ماتروحي من العنوان.
تسألي مين أول ما تدخلي؟
أول ما توصلي هتلاقي مبنى قديم جدا، بابه أثري ومزخرف، ومقفول بستارة، زيحي الستارة وادخلي، هتلاقي مكان كله بخار وزحمة جدا، ستات وبنات كبار وصغار في كل مكان بس كل حد في حاله، مشغول بنفسه ومحدش بيبص على التاني.
هتلاقي “ريسبشن” بس “بلدي”، يعني واحدة ست في وسط كل الزحمة قاعدة على مكتب خشبي صغير بتستقبل الناس. ادخلي عليها واسألها عن الحاجات اللي أنت حابه تعمليها وأسعارها، هتشرح لك سريعا جدا الحاجات اللي بتتقدم وسعر كل حاجة.
قبل ما تروحي، احنا هنقولك بعض المعلومات اللي ممكن تفيدك لو قررتي تزوري الحمام.
أولا، بالنسبة للفلوس والخدمات
70 جنيه
• “تكييس” وهو عبارة عن تدليك بغرض إزالة الجلد الميت بالإضافة إلى حمام بخار للجسم كله.
100 جنيه
• “تكييس” بالإضافة إلى حمام بخار للجسم كله.
• “سويت” لإزالة الشعر من كل الجسم.
• “ماسك” ترمس للوجه بيساعد على تفتيح لون البشرة وإزالة البقع الداكنة في الوجه.
150 جنيه
• “تكييس” بالإضافة إلى حمام بخار للجسم كله
• “سويت”
• “ترمس”
• “حمام مغربي”: عبارة عن وضع طمي مغربي على الجسم كله
ثانيا، اسأل مجرب
• ما تروحيش لوحدك، روحوا مجموعة من البنات.
• اتكلمي بلهجة قريبة من الناس اللي هناك عشان محدش يحس أنك بتتعالي عليه.
ثالثا، خدي معاك الحاجات دي
• لوف عادي ومغربي
• شامبو
• كريمات
• بشكير كبير
• مايوه وملابس داخلية