الإثنين 19 نوفمبر 2018 4:01 ص القاهرة القاهرة 18.6°

الأكثر قراءة

قد يعجبك أيضا

شارك برأيك

ما موقفك من المطالبات بحظر النقاب في الأماكن العامة؟

«جمعية بيوت الشباب».. سكن بأسعار من «زمن فات» داخل وخارج مصر

جمعية بيوت الشباب المصرية
جمعية بيوت الشباب المصرية
مي زيادي
نشر فى : الثلاثاء 4 نوفمبر 2014 - 9:14 م | آخر تحديث : الثلاثاء 4 نوفمبر 2014 - 9:14 م

أي حد بيقرر يسافر، أول حاجة بيسأل عنها هي الإقامة، ولأن فكرة البحث عن إقامة بتبقى مسألة متعبة سواء كان السفر داخل مصر أو خارجها، ففي أماكن ممكن تساعدك أنك تلاقي إقامة مناسبة وبفلوس معقولة جدا، من ضمن الأماكن دي جمعية بيوت الشباب المصرية اللي مقرها الرئيسي "جاردن سيتي" بالقاهرة.

زيارة واحدة لأي فرع للجمعية في المحافظة اللي أنت عايش فيها، وكارنيه عضوية ممكن يساعدك بنسبة كبيرة لو قررت تسافر في أي مكان في مصر، والفايدة أكبر طبعا لو قررت تسافر خارج مصر.

إيه الجمعية دي؟

جمعية بيوت الشباب المصرية هي هيئة خاصة تأسست سنة 1954 وتابعة لوزارة الشباب فنيا وإداريا، وهي عضو في الاتحاد الدولي لجمعيات بيوت الشباب، بتقدم أنشطة متعددة منها رحلات ترفيهية في مصر ودورات لتعلم حرف فنية زي "الرسم على الخزف"، وأهم حاجة بتقدمها توفير أماكن للإقامة للشباب على مستوى العالم، وممكن تعرف أكتر عنها من فيس بوك:

https://www.facebook.com/pages/Friends-of-Youth-Hostels/206852102718466

و

https://www.facebook.com/pages/Egyptian-Youth-Hostels-Association/139428246229627

طيب ازاي تستفيد من خدماتها؟

أي حد يقدر يستمتع بالخدمات اللي بتقدمها الجمعية، بس لازم الأول يكون عضو فيها، والعضوية تقدر تعملها بانك تروح زيارة لأقرب فرع للجمعية في المحافظة اللي أنت فيها، وتعمل كارنيه عضوية وبيكون ساري لمدة سنة كاملة.

أنواع العضوية:

بين 6 إلى 8 سنوات: 16 جنيه اشتراك سنوي.

فيما فوق الـ18 سنة: 50 جنيه سنويا.

عضوية دولية: ميزتها أنها ممكن تعمل لك تخفيض على وسائل المواصلات في البلد اللي أنت مسافر لها، وده حسب اللوائح اللي بطبقها كل دولة في التعامل مع بيوت الشباب.

فروع الجمعية فين؟

الجمعية لها فروع في 11 محافظة في مصر (القاهرة، الاسماعيلية، الاسكندرية، شرم الشيخ، الغردقة، الفيوم، مرسى مطروح، بورسعيد، أسيوط، سوهاج، أسوان).

لو عايز تسافر داخل مصر

لو عايز تسافر داخل مصر، فبعد ما تأخد كارنيه العضوية، تقدر تحجز "سرير" مش "غرفة"، لأن دي ثقافة بيوت الشباب في العالم كله، أي حجز بيكون بـ"السرير" مش بـ"الغرفة". فالغرفة الواحدة بيكون فيها أشخاص من بلد واحدة أو بلدان مختلفة.

وسعر الليلة فأي بيت شباب داخل مصر هو 45 جنيها مصريا في اليوم الواحد سواء للمصري أو الأجنبي، بالإضافة لـ3 وجبات خلال اليوم.

لو عايز تسافر خارج مصر

من أكتر الفوائد اللي ممكن تأخدها من جمعية بيوت الشباب هي أنه ممكن من خلال عضويتك تسكن في أي بيت شباب في أي مكان في العالم.

تعمل أيه بالظبط:

تروح على بيت الشباب اللي قريب منك أو تتصل بالمركز الرئيسي اللي هو في القاهرة، وتقوله البلد اللي أنت مقرر تسافر لها، والفترة اللي هتعد فيها، وهم عليهم عملية البحث عن أفضل بيت شباب مناسب لك في البلد اللي أنت رايحها، وهيجحزوا لك وبيكون في خصم تقريبا 10% وبتأخد وصل بالفلوس اللي ادفعت، والباقي بتدفعوا لما توصل للبلد اللي أنت مسافر لها.

هل تقدر تحجز في أي بيت شباب من غير الجمعية؟

أه، تقدر تحجز بنفسك في بيوت الشباب في أي بلد في العالم من خلال مواقع كتيرة أشهرها: WWW.HIHOSTELS.COM، بس الميزة أنه لو معاك عضوية في جمعية بيوت الشباب المصرية وحجزت من خلالهم بيكون لك تخفيض 10%، بالإضافة أنك هتوفر على نفسك أنك تدور على بيت شباب مناسب، هما أسرع وأمهر في ده ، لأنها ببساطة شغلتهم.

مدة الإقامة خارج مصر

أي بيت شباب ممكن تقيم فيه المدة اللي أنت محتاجها طالما البيت مفيهوش ضغط في الحجوزات ومتوفر مكان.

طب تقريبا ممكن أدفع كام لو خارج مصر؟

أسعار بيوت الشباب في العالم كله بتتغير من وقت للتاني خلال السنة حسب المواسم يعني، ولو قولنا مثال أنك مسافر ألمانيا وهتقيم في برلين مثلا في الفترة بين يناير و فبراير 2014، فتقريبا سعر الليلة يوازي 195 جنيه مصري في الليلة، وممكن يكون أقل أو أكتر حسب الفترة اللي أنت بتحجز فيها.

عنوان جمعية بيوت الشباب المصرية

1 شارع الإبراهيمي – جاردن ستي

بجوار السفارة السودانية وأمام السفارة الكندية

القاهرة – مصر



قد يعجبك أيضا

شارك بتعليقك