سلط الفنان بيومي فؤاد، الضوء على إبداعات المصريين في مناداة سائق الميكروباص بألفاظ معينة للتوقف من أجل النزول.
وقال «فؤاد»، في برنامج «بيومي أفندي»، المذاع على فضائية «DMC»، مساء السبت: «زمان لما كنا بنركب مواصلة كنا بنقول للسواق المحطة الجاية معاك ياسطى»، مضيفًا: «بعد كده الموضوع اتطور واتحول لعلامات مميزة، زي القهوة اللي جاية، أيوة الكاوتش معاك، البنزينة وحياتك».
وأوضح أن الأمر تطور بعد ذلك لأشياء غريبة، مستطردًا: «تلاقي واحد بيقول المطب الجاي يا زعيم، الشجرة الكبيرة يا معلم، كوم الزبالة اللي جاي من فضلك، البلاعة وحياتك».
وروى «فؤاد»، موقفًا كوميديًا حدث له في منطقة «رمسيس»، قائلًا: «كنت راكب عربيتي فلقيت أكتر من واحد بيقولوا "أم بيومي"، قولت أقرب يمكن حد شافني وبيهزر معايا، فلقيت واحد بيقول "أخرك أم بيومي ياسطى ولا هتكمل"، فهمت إن في منطقة اسمها أم بيومي، وقولت أجري قبل ما المسألة تتطور وتوصل لأم بيومي فؤاد».
وتابع: «عمرك ما تلاقي في أي دولة سواق ميكروباص بيلم الأجرة، وبيشرب شاي، ويفك من الكارتة، وعارف مين اللي مدفعش ورا، ويبعت الباقي من غير ما يتلخبط، وعينه على الزيون اللي في الشارع، ومشغل أغاني بصوت عالي، ويبص في المراية، ويسلك ودانه بمفاتيح، كل ده وهو سايق».