أعرب عبد الله عاصم المخترع الصغير عن حزنه لاتخاذه قرار عدم العودة مرة أخرى لمصر والاستقرار بالولايات المتحدة الأمريكية.
وقال عاصم المخترع الصغير "ناس كتير بتباركلي وناس كتير بتكتب تعليقات تقول إنها سعيدة إني أخدت القرار ده، بس الحقيقة أنا مش مبسوط".
وشرح عاصم أسباب عدم عودته على حسابه الشخصي على «فيس بوك» اليوم الاثنين، قائلا "أنا فعلا كنت راسم لحياتي طريق تاني، وكان نفسي أعيش وسط أهلي في أسيوط، كان نفسي أخدم بلدي وأنا في الصعيد، أقدم علمي وأفضل ﻵخر لحظة وسط أهلي وناسي، لكن كل ده تبخر في لحظة".
وعلل لجوءه لعدم العودة مضيفًا "القرار اللي أنا أخدته قرار صعب جدًا ولوﻻ أني لقيت مصريين محترمين ساعدوني في اتخاذ القرار ده كنت ممكن أضعف وأرجع واترمي في أي سجن ومحدش يسأل عني، النهاردة شفت مفارقة غريبة ومحزنة، شفت فيديوهات لروﻻ خرسا ولميس الحديدي بيشتموا فيا وفي أهلي علشان خفت أرجع، أيوه أنا خفت أرجع ومين فينا مابيخافش، خايف اعتقل بالسنين أو اتسجن بلا محاكمة أو أموت بلا تمن، وفي نفس اللحظة اللي شفت فيها الفيديوهات شفت هاشتاج الشباب عاملينه باسم «ارجع_يا_عبد_الله_علشان_عربية_الخضار»، ناس بتباركلي وناس بتشتمني وناس بتتريأ، وأنا بالنهاية قررت أعيش كإنسان".