أصدرت وزارة الداخلية منشورا إرشاديًا، صادر عن الإدارة العامة للمرور، بعنوان «أمنك على الطريق في سطور»؛ لتقديم عدد من الإرشادات المرورية لأصحاب المركبات.
وجاء في المنشور:
- وإنت سايق.. احتفظ بمسافة مناسبة بينك وبين اللي قدامك 4 أمتار لكل 10 كم سرعة، وخد بالك إن 30% من الحوادث بسبب عدم ترك مسافة الأمان.
- وإنت سايق اجعل استخدامك للهاتف المحمول للضرورة، وخد بالك إن نسبة كبيرة من الحوادث سببها استخدام الهاتف المحمول.
- لما تلاقي عربية طوارئ (إسعاف - شرطة أو مطافئ) وإنت سايق وسعلها الطريق وخد بالك إنها رايحة تنقذ مصاب أو تطفي حريق وخد بالك.. السير بدون لوحات معدنية «مخالفة جسيمة» تضعك تحت طائلة القانون.
- وإنت سايق داخل المدينة ماتستخدمش الأنوار العالية، وخد بالك إن ده بيمنع قائد السيارة في الإتجاه المعاكس من الرؤية تماماً لمدة 7 ثوانٍ.. خد بالك إن إجراء الصيانات الدورية لعربيتك هيحميك من حدوث أعطال مفاجئة تكلفة تصليحها بيبقى أضعاف تكلفة الصيانة الدورية، دة غير إنك بتعطل الطريق.. وخد بالك لازم تظبط وضع المرايات الجانبية قبل ما تتحرك.
- وإنت سايق لو عاوز تتخطى العربية اللي قدامك؛ اتأكد إن شمالك فاضي.. وخد بالك إن التجاوز الخاطئ سبب أساسي في حوادث كثيرة.
- وإنت سايق استخدم الإشارات الضوئية الجانبية قبل ما تدخل بالعربية يمين أو شمال.. وخد بالك إن ده لازم يبقى بوقت كافٍ لتنبيه العربية اللي وراك.
- خد بالك وإنت سايق في أوقات «سوء الأحوال الجوية» هدي السرعة وحافظ على التهوية داخل العربية علشان الشبورة واتأكد من كفاءة مساحة الزجاج واستخدم أضواء العربية للتنبيه وقت الضباب.
- وإنت سايق اتأكد دايماً من ضبط مستوى الهواء داخل إطارات السيارة.. وخد بالك إن الإطار الإحتياطي لازم يبقى جاهز لأي عُطل مفاجئ.