«بتحب السيما.. عايز تتعلمها صح.. طبعًا مش عارف تعمل ايه.. طيب إحنا هنقولك تقدر تتعلم فين، ببلاش أو بفلوس مش كتير»..
«بوابة الشروق» بتقدم لك 7 أماكن ممكن تستفاد منها:
المدرسة العربية للسينما والتلفزيون
بدأت أدور واسأل كتير من زمايلي اللي شغالين في السينما، وكلهم تقريبا نصحوني بـ«المدرسة العربية للسينما والتلفزيون» عشان بتقدم مناهج لكل التخصصات في السينما، وتقدر في الأخر تمتحن وتأخد شهادة احترافية معتمدة وتابعة لوزارة الثقافة.
الدراسة: أونلاين عن طريق الانترنت.. إعمل حساب لك على موقع الأكاديمية عشان تقدر تتواصل معاهم.. وكل حاجة هتلاقيها هنا: http://www.arabfilmtvschool.edu.eg/MainPage.asp
التكلفة: مجانًا
جيزويت القاهرة.. يا بلاش
جمعية النهضة العملية والثقافية المعروفة بـ«جيزويت القاهرة» مكان مشهور بتتعلم فيه فنون السينما للمبتدئين
الموقع: ميدان رمسيس وسط القاهرة
الدراسة: في مجالات «الإضاءة، الإخراج، التصوير، المونتاج، السيناريو»، مدتها 6 أشهر «3 مرات في الأسبوع»، بعدها مشروع تخرج «فيلم» عشان تتخرج وتاخد شهادة.
التكلفة: ببلاش
التوقيت: لازم تلحق تقدم في أكتوبر الحالي عشان تلحق المدرسة اللي جاية
وممكن تعرف كل حاجة عن الدراسة من اللينك ده: http://www.el-nahda.org
أو على فيس بوك: https://www.facebook.com/pages/El-Nahda-Jesuit-Cairo/248380561859286
«مرايتنا» في الدلتا والصعيد
شوفت صفحة مشروع «مرايتنا» على النت، وهو تابع للمبادرة العربية للإعلام الإلكتروني، واتنفذ في محافظات الدلتا «الغربية، الشرقية، الدقهلية، كفر الشيخ، دمياط، البحيرة».
الدراسة: تدريب شباب في سن (من 16 لـ35 عامًا) لانتاج أفلام قصيرة
التكلفة: مجانًا
المرحلة الأولى هتخلص في أكتوبر ده، والمرحلة الجاية في الصعيد قريب..
اللي حابب يشارك من الصعيد.. دي صفحتهم على فيس بوك: https://www.facebook.com/meraytna
التحرير لاونج
مشروع «التحرير لاونج» موجود في معهد جوته بوسط البلد في القاهرة.. معروف جدًا ومفيد، وأنا شخصيًا كان ليا تجربة معاهم.
الدراسة: بتتعلم في ورش قصيرة «مجانية طبعًا» في مجالات كتيرة جدًا منها السينما.
اتعرف على فعاليات المشروع من هنا:
https://www.facebook.com/TahrirLounge
أو http://www.tahrirlounge.org/index.php/ar/.
أكاديمية فنون وتكنولوجيا السينما
من أكتر الأماكن برضه اللي الناس بتشكر فيها «أكاديمية فنون وتكنولوجيا السينما» موجودة في استديو جلال في حدائق القبة
الدراسة: بيقدموا ورش قصيرة لمدة شهرين بتتعلم فيها تقارير تلفزيونية وأفلام وثائقية ودي أنا حضرتها شخصيا واستفدت منها، بس خد بالك الدراسة الطويلة عندهم تحديدًا في «الإخراج، والسيناريو»
المدة:4 ترمات وكل ترم 3 شهور
التكلفة: 3 آلاف جنيه للإخراج و2500 للسيناريو
ممكن تقدر تعرف المناهج من موقعهم http://www.raafat-elmihi.com/academy/index.php
أو تروح لهم زيارة هيشرحولك كل التفصايل.
قصر السينما
من ضمن محاولاتي عشان أتعلم السينما كانت في قصر السينما الموجود في جاردن سيتي
الدراسة:بتاخد دورة تدريبية في صناعة الأفلام مدتها 3 شهور
التكلفة: 1500 جنيه
ولو محتاج تعرف تفاصيل أكتر فأفضل طريقة تكلمهم على التليفون الأرضي 27948205، وتروح لهم زيارة بعد الساعة 4، هيشرحولك كل حاجة و هتعرف أسماء الناس اللي هتدرسلك.
المعهد العالي للسينما
المحاولة الأولى لتعلم السينما بالتأكيد بدأت من معهد السنيما، بس بعد تردد كان عدى على تخرجي أكتر من سنتين وكنت كسرت الـ26 سنة، وقواعد الدراسة منعتني من الانضمام للطلبة، لكن كان في حل اسمه الدراسات الحرة
الدراسة: أنظمة كتير منها الدراسات الحرة
التكلفة: 12025 جنيه مصري ومدتها سنتين
ودي صفحتهم على فيس بوك: https://www.facebook.com/EgyptianFilmInstitute/timeline.