ردت الإعلامية ريهام سعيد، على البيان الذى نشره المطرب محمد رشاد على موقع "فيس بوك"، يهاجم فيه تدخلها في حياته الشخصية، والذي نفى خلاله ما تردد خلال حلقة أمس من برنامجها "صبايا" على قناة الحياة، عن إصابة خطيبته السابقة المذيعة "مي حلمي" بجلطة دخلت على إثرها المستشفى، بعد إلغاء حفل الزفاف الذي كان مقررًا السبت الماضي.
ونشرت "ريهام"، بيانًا عبر موقع "انستجرام" ترد فيه على"رشاد" وكتبت: "رد واجب لفنان صاعد، أنا في حالة صدمة من تصريحاتك، الصحافة بتتكلم لمدة 3 أيام ومقررتش ترد غير عليّ، مع إني الوحيدة اللي متكلمتش على سبب الانفصال لأنه خاص بيك".
وتابعت: "مفيش حاجة اسمها حياة شخصية لشخصية عامة، وهي دي الضريبة وبالرغم من علمنا بالموضوع يوم الأحد، ماذعناش حرف، لحد ما الصحافة كلها اتكلمت، ومي دخلت المستشفى، ولحد ما كلمتها مكالمة وقالت هتتكلم عن الموضوع في برنامجي".
وأضافت: "حضرتك قمت بتأليف سيناريو إن أنا قلت إنك اتخليت عنها، ممكن يكون ده إحساسك، لكن أنا مقولتش حاجة شبه كده حتى، أنا قُلت بتمنى إنكم تتصالحوا ولو محصلش يبقى خير ليكم إنتوا الاتنين، وأنا قُلت إني بتكلم عنها مش عنك، لأن البنت دائمًا بتتأثر بإلغاء الفرح أكتر من الراجل".
وتابعت: "أستاذ محمد رشاد الـ5 دقايق اللي في صبايا، اللي بتمنى فيهم الشفاء لزميلة وبواسيها، مايجوش حاجة جنب الأخبار اللي على المواقع، ومتاخدش ريهام سعيد كبش فدا، وركز في مرض خطيبتك وإلغاء زواجك اللي هما أهم بكتير، وللعلم مصادري من أقرب المقربين لمي، وموثقة بصور المحادثات، وأخيرًا زي ما قلت في الحلقة اللي انت ماشفتهاش، بتمنى لكم التوفيق".
وعرضت "ريهام " خلال الحلقة صورة لـ "مى" من داخل المستشفى، تؤكد دخولها المستشفى بعد أزمة إلغاء زواجها من رشاد".
كان الفنان محمد رشاد هاجم الإعلامية ريهام سعيد، فى أول ظهور له بعد إلغاء حفل زفافه، بسبب تصريحاتها في حلقة أمس الإثنين في برنامجها "صبايا" المذاع على قناة "الحياة"، و التى تناولت خلالها تفاصيل أزمة إلغاء زفافه من المذيعة مى حلمى، والتى دخلت "مى "على إثرها المستشفى مصابة بجلطة، قبل الحفل بساعات، و نفى ما تردد خلال الحلقة ، مؤكدا أن "مي" لم تدخل المستشفى ، ولم تصاب بجلطة في المخ حسب قوله .
وكتب "رشاد "عبر موقع "فيسبوك": "الأستاذة الإعلامية الفاضلة، ريهام سعيد..أسمي وحياتي الخاصة والعامة لاتعنيكي في شئ، ومسمحش انك تصوريني في صورة الإنسان المستهتر بمشاعر الإنسانة اللي بيحبها أو بينا شئ محترم، لكن محصلش بينا نصيب لخلافات خاصة بينا قبل أي حد كائن من كان، والقرار بخيره أو بشره عائد علينا أولًا وأخيرًا، قدر الله وما شاء فعل، إن لم يشأ لم يكن وإن شاء قد كان".
وتابع: "المصادر الموثوقة اللي قالتلك إن مي جالها جلطة في المخ، موصلتش لحضرتك أنها كانت معايا أثناء عرض الحلقة بتاعتك، بنحاول نوصل لحل يرضي أطراف الخلاف اللي حدث يوم زفافنا، ومكنش ولله الحمد عندها جلطة في المخ بعد الشر عنها، وعن أي شخص معتقدش هتوصلك لأن مصادرك يا أستاذة يا كبيرة ضعيفة".
وأضاف:" مي بالنسبة ليا أكبر من كل الكلام اللي يتقال وهيقال لأن بينا عشرة وسنين شوفنا فيها حلوو وحش، ولو حضرتك كلمة كرامة لا تعنيلك شئ فأنا كرامتي وكرامة أهلي تعنيلي جدا وتهمني بعيدا عن كل المهاترات اللي تمك نشرها خلال الايام اللي فاتت وأنا إحتراما لأيام ومشاعر بينا محبتش أتكلم ولا هتكلم لإن مي سواء كانت شريكتي فالحياة أولا بنصيب وقدر الله تعنيلي كثيرا جدا".
وطالب "رشاد" ريهام سعيد بالتأكد من مصادرها قائلا : "أتمنى تتأكدي من مصادرك وأخبارك قبل ما تتناولي أعراض وحياة الناس الشخصية لأن بفضل الله أنا أهلي ربوني كويس وعرفوني الأصول والشهامة والأخلاق والكرامة قبل كل شيء".
يذكر أنه قد تم إلغاء حفل زفاف المطرب محمد رشاد والمذيعة مي حلمي ، والذى كان مقررا إقامته يوم السبت الماضى ، قبل ساعات قليلة ، دون إعلان الأسباب من الطرفين .