قال وزير التربية والتعليم الدكتور محمود أبو النصر، إن ميزانية التعليم في مصر لهذا العام تقدر بحوالي 87 مليار جنيه، وأن مستوى التعليم في مصر 30%، وأضاف في حوار مع أحدى الفضائيات أنه يهدف للارتقاء بالعملية التعليمية بنسبة تصل إلى 100% في 2017.

وعلى ما سنة 2017 تيجي ربنا يدينا طولة العمر ونشوف اليوم دا، فكلامنا هيكون عن كيفية اختيار مدرسة لابنك، لأن أهالي كتير بيلفوا حولين نفسهم لفترة طويلة ممكن توصل لسنة واتنين علشان يختاروا مدرسة.

مع بعض هنتعرف على أهم المعايير اللي تركز عليها في اختيار مدرسة ابنك، من خلاصة تجارب العينة العشوائية اللي اتكلمنا معاها، لأن التجربة أهم بكتير من الخطوات النظرية.

قبل ما نبدأ في الخطوات

لازم تحدد دائرة معارفك وأصدقائك اللي أكيد هتسألهم عن مدارس أولادهم لو مستوى الولاد التعليمي عجبك أصلا، لكن ما تعتمدش على رأي اللي حواليك لإن طفل جارك ممكن يكون مستوى استيعابه غير طفلك، وفي الآخر المدرسة واحدة.

ممكن كمان تستعين بكتاب Schools Guide لراغبي التقديم في المدارس الخاصة في معلومات عن كل المدارس اللي ممكن تقدم فيها لأولادك بمواصفاتها ، وتقدر تحصل عليه من محلات لعب الأطفال الكبيرة ، وسعره في السوق يتراوح ما بين 30 – 50 جنيه.

1 – المصروفات

مروة مصطفى، ولية أمر لطفلين في المرحلة الابتدائية، رأيها إن المصروفات الأعلى "معناها إن التعليم أفضل في المدرسة دي".

جيجي صبري شايفة إنه "مش أكيد أن المدرسة غالية معناها تعليم أفضل، الرك في الآخر على المدرس.

جيجي بتدفع لابنها 10 آلاف في السنة، ورأيها إن المدرسة ما تساويش 1000 جنيه.

مبلغ المصروفات لا يدل على نوعية التعليم أو جودته، لكن المصروفات الكبيرة عادة ما تكون مجرد "مؤشر" على ارتفاع مستوى التعليم.

2- الدين والهوية الثقافية

لو كنت عايز تركز على الجانب الديني في تربية طفلك من الصغر، اعتمد على مدراس بتهتم بتفاصيل دينية بسيطة في حياة طفلك، زي نبدأ بالبسملة في بداية الأكل، دعاء ركوب باص المدرسة الصبح، تحفيظ القرآن .. إلخ.

وده كان اللي بتدور عليه "دعاء . ب " لما فكرت تقدم لبنتها أول سنة في المدرسة، "لإن الانفتاح دلوقتي بيخلينا نركز أكتر مع ولادنا في تنمية النزعة الدينية".

السيدة "م .صيام" أدخلت بنتها مدارس راهبات لإنها شافت فيهم الالتزام بالقيم والعادات المجتمعية، "وبيهتموا بتحفيظ القرآن زي ما بيهتموا بتحفيظ الترانيم، وبيراقبوا الولاد في أدق التفاصيل حتى في فسحة المدرسة".

لكن "م موسي" ندم إنه أدخل ابنه مدرسة بتمثل الثقافة الغربية لإنها "خلت ابني بيتغرب عن بيئته المصرية، وعاوز يعيش بره".

إنت اللي بتحدد لابنك عايز تنمي فيه إيه وبناء عليه بتختار بين الاهتمام بالدين والثقافة العربية أم الأجنبية.

3- الاختلاط بالجنس الآخر

السيدة منال كانت متخوفة على بنتها من التعامل مع الأولاد في المدرسة. "بنتي كانت في مدرسة بنات، ولما اتنقلت لنظام تعليمي مختلف، الأمريكاني، في مرحلة الثانوية العامة كان نظامها مشترك، كانت قلقانة جداً من التعامل مع الولاد". منال شايفة إن الفصل بين الجنسين أفضل.

سماح إبراهيم ترى العكس. "كل مرحلة عمرية بيكون ليها مشاكلها، والمدرسة المشتركة أفضل للجيل الحالي. بناء على تجربتي الشخصية في مدارس للبنات بس، لقيت صعوبة في التعامل مع الولاد لما دخلت الجامعة، فقررت ان ولادي يروحوا مدارس مشتركة. الانفتاح دلوقتي بقى غير عادي".

أياً كان قرارك لازم تقرأ كويس عن ايجابيات وسلبيات الاختلاط بالجنس الآخر في المدرسة من عدمه .

4- أسلوب التعليم

"أسلوب التعليم المعتمد على الابتكار والبحث واختيار المواد المؤهلة للكلية، مش الحفظ والتلقين والحشو هو أفضل أسلوب، وده نظام التعليم "الأمريكي"، البنت كانت مبسوطة وهي رايحة المدرسة".

دي خلاصة تجربة جيهان، ولية أمر ومدرسة كيمياء بمدرسة حكومية مع بنتها اللي التحقت بالجامعة من 6 سنوات.

مش كل الأهالي هتكون قادرة ماديا تعلم ولادها بالنظام الأمريكاني، والمشكلة حلها مش عند الأهالي، حلها عند المسؤولين عن العملية التعليمية، يرحموا التلاميذ ويغيروا المناهج وإسلوب الشرح.

5 – التواصل مع أولياء الأمور

لا توجد مدرسة تتواصل مع أولياء الأمور، العكس هو الصحيح، هكذا يقول أغلب أولياء الأمور. لكن المدارس بتتفاوت في الاهتمام بالمشكلة، فلازم تكون حريص على اختيار المدرسة اللي بتهتم بمشكلة أولادك لما تتكلم معاهم.

"كل حاجه في التعليم بقى بتمنها" دي الجملة اللي شرحتلنا بيها السيدة سهير، ولية أمر لطفلين، طريقة تعامل مدرسة أولادها مع مشاكلهم لإنها بتدفع فلوس كتيرة قصاد "الخدمة" على حد تعبيرها.

اهتمام المدرسة بالتواصل مع ولي الأمر إشارة مهمة على أن المدرسة تحترم أسرة التلميذ، وغالبا ما يتكلم الآباء "بقلب جامد" مع المدارس الأغلى في المصروفات، لأنهم "دافعين كتير".

6- الأنشطة المدرسية

مسألة نسبية في اختيار مدرسة طفلك، لكنها تؤثر بلا شك في نفسية الطفل وشخصيته، ودا اللي شافته مروة، "تفاوت أسعار المدارس بيرجع على الولاد في الآخر في الأنشطة الترفيهية، أو ما يطلقون عليه ال "fun day".

لكن سماح إبراهيم على الرغم إن مدرسة ولادها بتوفرلهم أنشطة ترفيهية مثل ركوب الخيل وحمامات السباحة إلا إن "دا ما كانش معيار مهم بالنسبة لي مقارنة بإسلوب تعليم المدرسة".

كل طفل في مراحل التعليم المختلفة من حقه يستمتع بالأنشطة الترفيهية في مدرسته، بداية من المدارس الحكومية وما حدش يقولي "أجيب لكم منين".

7- القرب من المنزل

معيار مهم جداُ لازم تاخد بالك منه وإنت بتختار مدرسة أولادك ، خصوصاً في حالات الطوارئ لا قدر الله القرب من المدرسة مهم جداً لأولادك ، لكن بالطبع ما يجيش على مستوى المدرسة في المعايير الأخرى.

القرب من المنزل عنصر "نفسي" مهم لبعض الآباء، لكن من الأفضل تغليب المستوى الدراسي والتربوي على القرب المكاني.

8- وزيارة مفاجئة للمدرسة

على الرغم إن ده من أهم المعايير في اختيار مدرسة طفلك لكن أرجأناه في النهاية لأهميته، علشان يكون آخر حاجه تثبت في ذهنك.

زيارة المدرسة لازم تكون وقت الدراسة مش وقت التقديم. من المهم القيام بجولة في أنحاء المدرسة، الفصول، نضافة الحمامات، كم تلميذ في الفصل، إلخ..

التركيز على معايير سلامة المباني، مساحات الفصول وتصميمها، مساحة المدرسة ونسبتها لكثافة الطلاب.

لو طلب ولي الأمر من إدارة المدرسة التحرك بحرية في جولة بالمدرسة ورفضت، يبقى لازم يشك بنسبة كبيرة إن المدرسة عندها أخطاء.

أول يوم في الدراسة

من الأفضل أن يذهب الطفل للمدرسة بصحبة الوالدين أو أحدهما، ودا غالبا متاح في كل المدارس، علشان الأهل يشوفوا تصرفات الطلبة، تعامل المدرسين معاهم، شكل المدرسين وطريقة كلامهم، وعقلياتهم.