النفسية مع د. محمد طه: قبل الزواج

آخر تحديث: السبت 10 أبريل 2021 - 6:55 م بتوقيت القاهرة

فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

السلام عليكم يا دكتور.. أتمنى تكون حضرتك بخير..
أنا فتاة من لبنان عمرى ٢٣ سنة وحتكلم مصرى عشان تكون لغتى واضحة بالنسبة ليك.. دكتور أنا متقدملى شخص من مصر من الصعيد.. عاوزه أعرف رأيك فى موضوع نجاح العلاقة هل الاختلاف اللى بينا الكبير ده هيؤثر فى المستقبل؟ علما إنى أنا طالبة طب نفسى فى الجامعة وبنت مدينة مش قرية.. إزاى أعرف إنه هو صادق مش بيضحك عليا؟
أتمنى إنك ترد على رسالتى عشان رأيك يهمنى جدا..

عزيزتى..
أشكرك جدا على سؤالك..
الارتباط ما بين ثقافات مختلفة بيكون فى أوقات كتير فرصة لحياة جديدة ومتنوعة ومختلفة فيها قبول واحتواء واستيعاب.. لكنه كمان بيكون مليان تحديات وصعوبات تحتاج لشجاعة وسعة أفق.
فيه بعض الأشياء المهمة اللى أعتقد من خلال شغلى وخبرتى إنه من الضرورى تواجدها قبل الزواج بشكل عام، وقبل الزواج من ثقافة مختلفة بشكل خاص:
ــ مهم تتأكدى إن اللى هاترتبطى بيه قابلك وموافق عليكى وراضى بيكى كما أنتى.. بدون أى تعديلات أو تغييرات.. على سبيل المثال وليس الحصر: طريقة لبسك.. طبيعة شغلك.. نوعية علاقاتك. زى بالظبط ما هو مهم تكونى قابلاه وموافقة عليه وراضية بيه كما هو بنفس التفاصيل.
ــ أقترح عليكى تزورى انتى وأهلك مكان معيشة زوج المستقبل.. وأقترح عليه يعمل نفس الكلام.. تشوفوا أهل بعض.. تتعاملوا مع بعض.. تشوفوا طريقة تفكير أنفسكم وأهلكم على أرض الواقع.. تستكشفوا العوامل الاجتماعية والثقافية والاقتصادية لبعض بكل وضوح ومباشرة من الأول.
ــ تتفقوا هاتعملوا إيه وقت الخلاف.. هل حد فيكم كلامه هو اللى لازم يمشى، واللا تشوفوا حل ثالث، أو رأى آخر.. هاتعملوا إيه؟ هاترجعوا لمين؟ وتتأكدوا إنكم إنتم الاتنين موافقين على ده.
ــ أقترح وجود فترة خطوبة لا تقل عن عدة أشهر، تعرفوا بعض فيها أكتر.. تتعاملوا فيها بشكل أقرب.. تجربوا الاتفاق والاختلاف.. السماع والكلام.. التواصل والانتظار.. وتتأكدوا بشكل نهائى من قراركم بالزواج.
الكلام ده مالهوش علاقة بهو منين وانتى منين.. لكنه ــ فى رأيى ــ بعض القواعد العامة والأساسية لأى اتنين مقبلين على الزواج.
كل التوفيق إن شاء الله.