النفسية مع د. محمد طه:أنا مريض.. أنا خائن

محمد طه
محمد طه

آخر تحديث: السبت 16 يناير 2021 - 7:40 م بتوقيت القاهرة

فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

أنا مخطوبة لشخص وأنا بحبه وهو بيحبنى.. من قبل الخطوبة كنت عارفة إنه عنده وسواس قهرى وكان بيتعالج منه ووقف للعلاج..
الوسواس عنده كان فى النضافة والترتيب والأفكار.. كان دايما بيقولى إن فى حد بيتكلم ف دماغه وبيقنعه بأفكار كتير وإن كان فى دوشة ولخبطة فى دماغه، وعلشان يرتاح كان بيسمع للأفكار دى وينفذها.. وفعلا اتعالج من موضوع النضافة وترتيب الأشياء.
من فترة قريبة اكتشفت إنه بيدخل فى علاقات نسائية كتير.. بيتعرف على بنات وستات.. بينزل يقابلهم.. الموضوع اتطور إنه بيدخل فى علاقات محرمة.. كل مرة كنت بواجهه كان بيعتذر ويقولى إن ده بيحصل لأنه حاسس بحالة من اللغبطة.. ويرجع يحصل نفس الموضوع.. ووعدنى إنه هيتعالج.
بس أنا وصلت لمرحلة كبيرة من الشك، وده عاملى أزمة حاليا معاه إنى بشك فى كل تصرف هو بيعمله.. هل الموضوع ده فعلا ليه علاقة بالوسواس القهرى؟ وهل ده هيفضل مستمر معاه مدى الحياة؟
أنا خايفة أكمل واتجوز والموضوع ده يحصل تانى.. وفى نفس الوقت أنا بحبه، وهو كان مصارحنى إنه عنده وسواس قهرى وأنا تقبلته.


أختى العزيزة..
خلينى أتناول موضوعك على جزءين..
أولا.. هل يمكن الارتباط بمريض نفسى؟ يمكن طبعا بشروط: إن مرضه مايكونش بيعوقه عن الحياة الزوجية والاجتماعية.. إنه يكون بيشتغل.. إنه يكون بيتعالج ومنتظم على العلاج والمتابعة مع طبيب مختص.. وأن تكون حالته مستقرة على العلاج.
المريض ــ سواء نفسى أو غير نفسى ــ اللى يبطل أو يهمل فى علاجه، بيعرض حياته وحياة أسرته للخطر وعدم الاستقرار.. المريض اللى يتحجج بمرضه ــ النفسى أو غير النفسى ــ علشان مايشتغلش رغم رؤية ونصيحة الأطباء لإمكانية العمل، فهو غير مسئول، وغير أهل لتكوين أسرة.
ثانيا.. يا سيدتى.. مشكلتك ليست عن الارتباط بمريض نفسى.. مشكلتك ــ فى رأيى ــ عن الارتباط بخائن..
المرض النفسى ليس مبررا للخيانة.. ومافيش تشخيص فى الطب النفسى اسمه (الخيانة).. وماينفعش نخلط بين الاضطرابات النفسية.. وسوء السلوك..
مش معنى إن حد مريض نفسى، إنه غير مسئول عن أفعاله ــ إلا فى حالات نادرة جدا جدا..
مش معنى إن حد مريض نفسى، إنه لا يملك القدرة على معرفة الصواب من الخطأ، وإنه يختار، ويقرر، وبكامل وعيه.. إلا فى استثناءات قليلة يتطلب تشخيصها الحجز فى مستشفى نفسى لفترة غير قصيرة لملاحظة تصرفات المريض وسلوكه من لجنة طبية عالية التأهيل.
ماينفعش حد يبرر علاقاته المحرمة المتكررة بإنه (مريض نفسى).
عاوزه تحبيه.. حبيه.. بس عامليه على إنه إنسان مسئول عن أفعاله.. مش طفل صغير يحتاج رعاية وأمومة..
عاوزه تسامحيه.. سامحيه.. بس فرقى كويس بين العرض المرضى، والخطأ البشرى..
عاوزه ترتبطى بيه.. ده حقك ولا يملك أحد نزعه منك.. بس خليكى عارفه إن مرضه لا يبرر بالضرورة سوء سلوكه..
عارفه إيه أكتر حاجة إحنا محتاجينها فى علاقاتنا.. واللى هاتفض كتير من الاشتباكات والألغام العلاقاتية الخطرة.. وتريحنا كلنا بلا استثناء..
محتاجين نسمى الأشياء بأسمائها..
بس..
دعواتى معك..

هذا المحتوى مطبوع من موقع الشروق

Copyright © 2024 ShoroukNews. All rights reserved