النفسية مع د. محمد طه .. إزاى أخليه يتغير؟

آخر تحديث: السبت 20 فبراير 2021 - 9:05 م بتوقيت القاهرة

فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

إزاى أخليه يتغير؟
باتمنى ترد على رسالتى يا دكتور..
أنا فرحى بعد أربع شهور.. واتخطبت حوالى سنتين.. خطيبى مابيسمعنيش خالص، حتى لما باحكيله مشكله عنى بيكتفى إنه يقولى: إن شاء الله خير.. نفسى يفكر معايا أو يهونها عليا، وخايفه يفضل كده بعد الجواز. كل ما أقوله حاجه زى دى، مابيردش ويغير، يا إما نتخانق..
أعمل إيه أو انصحنى إزاى أخليه يتغير؟

عزيزتى..
يبدو أن السؤال ده هو أكتر سؤال بتسأله الفتيات/ السيدات بخصوص العلاقات.. لو شوفتى الاستشارة الأخرى الموجودة النهاردة ــ وكتير غيرها طبعا ــ هاتصدقينى..
احنا مش بنرتبط علشان نغير حد..
احنا مش بنتخطب علشان نعدّل حد..
احنا مش بنتجوز علشان نعالج حد..

انتى ارتبطتى بيه وهو كده.. يبقى تعملى حسابك إنه هايفضل كده.. وحتى لو اتغير، ده احتمال وارد لكنه غير أكيد وماينفعش تراهنى عليه..
انتى عرفتيه كده.. يبقى ترتبى نفسك انه هو كده.. مناسب ليكى وهو كده كملى معاه.. مش مناسب ليكى وهو كده ماتكمليش معاه.
انتى رضيتى بيه على هذا الحال.. يبقى هذا هو الحال.. عجبك هذا الحال تمام.. ماعجبكيش تتوكلى على الله وتسيبيه.
زى ما هو مطلوب منه يغيرك.. انتى مش مطلوب منك تغيريه.
زى ما هو ماينفعش يفصلك على مقاسه.. انتى برضه ماينفعش تفصليه على مقاسك..
يا تقبليه كله على بعضه كما هو.. يا ماتقبليهوش كله على بعضه كما هو..

يا ستى.. يا كل ست..
انتوا مش كفيلات خُطّابكم..
انتوا مش مُعيلات من ارتبطوا بكم..
انتوا مش أمهات أزواجكم..

نقول كمان..
احنا مش بنرتبط علشان نغير حد..
احنا مش بنتخطب علشان نعدّل حد..
احنا مش بنتجوز علشان نعالج حد..

التغير النفسى عملية ذاتية تلقائية.. ماتجيش بالطلب.. ولا بالزق.. ولا بالتهديد..

نصيحتى ليكى هى: بدل ما تسألى هذا السؤال لى.. اسألى نفسك: أنا ينفع أكمل معاه وهو كده واللا لأ؟
اجابتك على سؤالك.. هو إجابتى على سؤالك..