في دايرة الرحلة (14): قول لي الrecommendations بتاعتك.. أروح فين؟!

آخر تحديث: الجمعة 25 أبريل 2014 - 11:38 م بتوقيت القاهرة

من الأسئلة اللي بتجيلي كتير جدا من صحابي اللي مسافرين أو ناويين يسافروا خاصة لو مكان أنا رحته قبل كدا: "قولي الـrecommendations بتاعتك؟" ، السؤال الدائم أبدا، طيب أنا مسافر باريس أهو يا عم وحجزت، أروح فين بقى في باريس؟ إيه الأماكن اللي مينفعش أفوتها؟ إيه الأكلات اللي لازم أجربها؟ إيه الحاجات الفكسانة اللي فكك منها ومتروحهاش؟

كنت اتكلمت في مقال سابق عن كذا موقع ممتازين في الحتة دي زي Stay.com وFodors وهوستل وورلد.

يمكن Stay هو اللي فيهم فيه دليل متكامل شوية عن البلد اللي هتزورها لكن المواقع دي برده مش كاملة في تقديري، فالنهاردة هستعرض معاكم كام ويب سايت تانيين بقى هم زهرة الزهرة وخلاصة الخلاصة...

Rough Guides:

اللينك: http://www.roughguides.com

موقع رائع جدا اكتشفته مؤخرا مليان معلومات ممتازة للسفر، الموقع أساسا هدفه يوفر guides للسفر وبيطبعوا كتب بفلوس لكن محتواهم المجاني عبقري!

الويب سايت مقسوم لأكتر من جزء، الجزء المهم والأساسي هو Rough guide to وفيه تقريبا كل البلدان اللي ممكن تتخيلها مرتبة أبجديا..

تعالوا نستعرض مثلا ايطاليا:

هتلاقي دليل ايطاليا متقسم زي مانت شايف، لمقال عام بيحكي فيه عن ايطاليا، على اليمين المدن والمناطق وأدلتها، وأقسام الدليل بيتكلم عن تروح فين؟ تروح امتى وازاي؟ الأيس كريم الإيطالي، الدوري الإيطالي (الكالتشيو) وEssentials دي الحاجات الأساسية اللي هي دي:

الحاجات اللي مينفعش تفوتها وأنصحك بشدة بتفقد الجزء دا في كل بلد!

استكشف ايطاليا، Itineraries ودي المسارات المقترحة ليك جوا ايطاليا و مميزاتها وجاليري الصور، وعامة من أروع الحاجات في الموقع ده الصور الخرافية اللي بيحطها !

ودا مش كل حاجة، عندك كمان المينيو العبقرية دي:

قسم things not to miss دا فرض عين على أي مسافر إنه ياخد بصة عليه، بيقولك 20 حاجة في البلد اللي انت مسافرها دي لازم تجربها.. معاهم صور هتخليك عايز تقوم تركب الطيارة دلوقتي حالا، في ايطاليا (عملت أنا في رحلتي لايطاليا 8 من الـ20 دول) على سبيل المثال:

وطبعا قسم المسارات المقترحة دا برده ممتاز جدا، بيقترح عليك 3-4 مسارات تحت عنوان معين، يعني مثلا في ايطاليا قال لو انت جي تشوف الثقافة والفن امشي السكة دي، لو جاي تجرب الأكل جرب المسارات دي وهكذا:

العظيم كمان ان الموقع دا فيه جزء Community مش بس الكتاب، منتدى تخش تقرا فيه وتتفاعل وتسأل وتطلع بمعلومات روعة، والمدخل بتاعه مجمعلك أهم البوستات وأشهرها بشكل جذاب جدا:

بونص: متفوتش جزء الجاليري، طريقة عرضهم للصور عبقرية !

الموقع دا فرض عين فعلا على كل حد مسافر يقعد يقلب فيه كدا، رائع جدا وهيديلك أوفر view حلو كدا عن المكان اللي انت مسافره...

Atlas Obscura

اللينك: http://www.atlasobscura.com

دي من مميزات الكتابة والمشاركة، الموقع دا انا مكنتش أعرفه عنه حاجه لغاية ما أحد القراء (عمرو التوني) قال لي عليه في كومنت على مقال سابق، شكرا لعمرو لأن الموقع دا رائع جدا وبيغطي حتة مش موجودة في أي موقع سفر شفته قبل كدا!

اسم الويب سايت جاي من كلمة obscure، اللي هي الغير مكتشفة، الموقع هو أطلس الأماكن الغير مكتشفة، مش هتلاقي فيه المزارات السياحية التقليدية اللي متوقع تشوفها وانت بتدور على أي بلد، هو بيدور على الحاجات الغريبة والمجنونة، زي مثلا بيوت الاشباح !

أماكن زي مثلا:

متحف الـ«سمايلي فيس» في بروكلين:

أو المدن المهجورة في أوكرانيا عقب كارثة تشرنوبل:

كل الناس تسمع عن سور الصين العظيم، لكن عمرك سمعت على سور الهند العظيم؟

الموقع كمان مليان مقالات عظيمة عن السفر والأماكن الغير مطروقة بشكل عام، لو بتدور على حاجه جديدة ومختلفة جرب الويب سايت دا !ط

MicroGuides

اللينك: http://unique-guides.com

فكرة جديدة برده في طريقة تقديم الـguides، الويب سايت دا بيديلك مجموعة من الفيديوهات التفاعلية لكل مدينة متقسمة لنوعين:

Menu و Alacarte.

المنيو عبارة عن وجبة متكاملة، بيديك اختيارات زي اللي انا مشير لها فوق في مدينة باريس، عايز يوم LUXurious? ولا Hip؟ اخترت دليلك المفضل؟

يبدأ معاك اليوم من الصبح يقولك هنروح نفطر فين؟ دليل سريع عن الكافيه ولقاء مع صناع القهوة فيه، وبعدين ياخدك على مكان فسحة الصباح، وبعدين جت لحظة الغداء، هنا بيقف الفيديو ويديك اختيارين وانت تدوس على الاختيار اللي عاجبك عشان يكمل الفيديو:

ويكمل بالطريقة دي معاك لآخر اليوم. وزي ما هتلاحظ هتلاقي إمكانية انك تشوف ليستة الأماكن اللي اتزارت في الـguide اللي انت لسه شايفه دا ولو دست عليه يوريك مكانه على الخريطة:

اختيارك التاني Alacarte...

ودا بيوريك الأماكن نفسها على طول وانت تختار وتشوف مكانها على الخريطة وفيديو تعريف صغير والفيديوهات متقسمة لمطاعم وتجارب وكافيهات... إلخ

الويب سايت كمان فيه جزء «الميكرو جايدز» اللي عملها الزوار.. عبارة عن خرايط بأماكن لطيفة للأكل والتجارب والكافيهات:

وبيسمحلك تجرب تعمل الجايد بتاعك، السايت ليه برنامج على آيفون اللينك بتاعه اهو بس ملوش على أندرويد لسه.

طبعا برده دي مش كل المواقع الحلوة للـTravel guides فيه لسهPriceoftravel وbudgettravel وtripadvisor ومواقع تانية كتيرة! بس المقال مش هيكفي اكتر من كدا، فأوعدكم كل فترة كدا زي ما عملت قبل كدا استعرض معاكم كام ويبسايت من اللي بحبهم واللي فيهم حاجة مختلفة تستاهل تتشاف زي اللي فوق دول ولو حد عنده مواقع أنا متكلمتش عنها فيها معلومات مفيدة وتستاهل يا ريت ميبخلش علينا في التعليقات، منها عرفت الويب سايت الرائع اللي قلتلكم عليه فوق atlas obscura.

سافروا تصحوا..

تابعوني على نوّرني:

http://www.facebook.com/nawarny11

تابعوني على فيسبوك:

http://www.facebook.com/ze3r0