مهرجان الأقصر.. تجارب فوزي العوامري في عالم الديكور السينمائي بـ«ماستر كلاس»
آخر تحديث: الثلاثاء 7 فبراير 2023 - 10:03 م بتوقيت القاهرة
خصص مهرجان الأقصر للسينما الإفريقية محاضرة (ماستر كلاس) لمهندس الديكور فوزي العوامري، يحكي فيها عن محطات في مشواره، وتجارب كانت مؤثرة في عمله بالسينما والمسلسلات، وأدار الندوة الناقد أحمد شوقي.
تحدث فوزي العوامري عن مهنته وحبه لها وذكرياته مع النجوم، كأحمد زكي ومحمود عبد العزيز، وتنفيذه لأفلام ولاد العم، وأوقات فراغ، وعمارة يعقوبيان، وقال خلال الندوة: "أنا كمهندس ديكور مسئول عن كل حاجة بتتشاف والجمهور هيشوفها ولا يسمح بالخطأ ومسئول عن الانطباعات اللي هياخدها الناس، ولا يصح مثلًا سيدة خارجة من كارثة وحاطة ميك أب ولابسه شيك".
وتابع في حديثه: "أنا مسئول عن تعبيرية المشهد وتفاصيله وبيئة العمل، وفيلم ولاد العم خد مني دراسة رهيبة حتى لا يكون فيه أي خطأ، وروى مهندس الديكور فوزي العوامري ذكرياته مع النجم الراحل محمود عبد العزيز، قائلًا: اشتغلت مع محمود في فيلمين: القبطان، والبحر بيضحك ليه، وكان قد اتصل بي مهندس الديكور أنسي أبو سيف وقال لي: يا فوزي اعمل الفيلم وخليك مهندس الديكور وإحنا بنعمل كل حاجة إلا خراب البيوت ووقفت بعد ما كنت رافض".
أما عن ذكرياته مع النجم الراحل أحمد زكي في فيلم اضحك الصورة تطلع حلوة وفيلم معالي الوزير، قال: "أحمد زكي كان بيقيس عليا المشهد ويتابع رد فعلي فيه، وفي فيلم معالي الوزير كان هناك مشهد وهو بيطلع من الوازرة بيصور في البروفة كلامه قاله بصوت محشرج فسألني: حلو المشهد، وكان أمام المخرج سمير سيف فقلت له: كويس ولكنه لمح على وجهي علامات عدم الرضا، فقال لي نعمله تاني وبعد المشهد قالي عملتلك اللي أنت عاوزه".
وأردف في حديثه: "لكن في فيلم اضحك الصورة تطلع حلوة منى زكي كانت عاوزة تلبس جينز ضيق في مشهد دخولها الجامعة، قلت لها طبعًا لا يجوز إنتي من بيئة مختلفة عن الموجودين في الجامعة هتلبسي بنطلون جينز واسع".
وتابع: "والمشهد التاني لما أحمد زكي نزل يجيب المفتاح من حمام السباحة وطلع كله ملابسه مبلولة، عملنا ديكور حمام طلع عنينا فيه مع شريف عرفة وأحمد زكي بينشف نفسه وسيدة تناوله المنشفة وحصل تلامس بينهما، وبعد التصوير شريف عرفة حذف المشهد، لأن الفيلم هيدخل البيوت المصرية وهو بيراعي العادات وبيحافظ على الذوق العام حتى لو كان الكاتب وحيد حامد".
ثم انتقل في كلامه عن فيلم أوقات فراغ، قائلًا: "كان فيه ولدين صغيرين مؤلفين عمر جمال ومحمد مقبل محمد واحد ثانوية عامة والثاني في أولى جامعة 16 و17 سنة ذهبوا وقتها لحسين القلا في مكتبه كاتبين سيناريو فيلم أوقات فراغ في كراسة خدهم وراهم السيناريوهات بتكتب إزاي وكلمني وشوفت السيناريو، قلت له نفسي في حياتي اسمي يتحط على الفيلم ده وكان باين إن العمل ده مميز".
واستكمل حديثه، قائلًا: "اتعرض عليا فيلم علاقات خاصة ولقيت فيه مشاهد متحررة ومنفلتة رفضته؛ لأن إزاي لما ابني يكبر يشوف الفيلم هقوله إيه والفيلم ليس فيه أي مستوى فني".
وتحدث فوزي عن فيلم عمارة يعقوبيان، وقال: "قبل التصوير لما رحت مع مروان حامد أشوف العمارة قلتله لازم تتغير كلها؛ لأنه رغم إن العمارة حقيقية ولكنها لا تعطي الإحساس، وفي فيلم السلم والثعبان عملت الديكور والملابس".
واختتم فوزي ندوته قائلًا: "الشغلانة حلوة والمهندسين اللي بيشتغلوا معايا بينبسطوا مني أوي وأنا دائمًا بقول كلمة مش عارف، وأنت اللي بتسوق العمل وتعمله إزاي، وهدفي صناعة جيل جديد".