دينا الشربيني عن هيثم أحمد زكي: «كان بيقولنا اسألوا عليا أحسن أموت لوحدي»

آخر تحديث: الجمعة 8 نوفمبر 2019 - 11:28 م بتوقيت القاهرة

نعت الفنانة دينا الشربيني، الفنان هيثم أحمد زكي، الذي رحل عن عالمنا فجر أمس الخميس، نتيجة لهبوط حاد في الدورة الدموية.

ونشرت "الشربيني" عبر صفحتها الرسمية بموقع "فيسبوك" ، صورة تجمعها بالراحل هيثم أحمد زكي والفنانة ناهد السباعي، وعلقت قائلة: "أنا مش قادره اصدق أنى مش هشوفك تانى.. ولا هتكلمنى فى التليفون تانى وتقولى يالا نتقابل.. ولو مردتش عليك الاقيك بعتلى مسدچ بتقللى طظ فيكى مش هكلمك تانى، وأول ما ابعتلك اقولك يابنى ملحقتش ارد ده التليفون رن مرتين تقولى خلاص امسحى المسدچ وكأنى مبعتلكيش حاجه".

وأضافت: "طول اليوم كنت بهرب من أنى اصدق ان ده حصلك أنت ياهيثم.. لحد ما جيت انام ومش هاين عليا أنام واحنا سيبينك لوحدك.. كنت دايما تقولنا كلنا اسألوا عليا لحسن اموت لوحدي ومحدش يعرف.. كنت طيب وجدع وحنين".

وتمنت "الشربيني" أن يسود الحب بين الناس وألا ننتظر موت أحد منا لكي نفهم أن الدنيا مش مستهلة.

وأوضحت دينا الشربيني قائلة: "هيثم شاف أيام صعبه وضغط كبير من الناس وتنمر ومقارنه مش عادله وللأسف مشفش حب الناس له اللي إحنا شايفينه دلوقتي.. أنا عارفه انك فى مكان احسن من اللي احنا فيه وسط حبيبك.. كان نفسك تروحلهم واديك روحت يا هيثم".

وكانت مديرية أمن الجيزة، قد تلقت إخطارا من مباحث قطاع أكتوبر، بورود بلاغ من خطيبة الفنان الراحل بأنها حاولت الاتصال به أكثر من مرة ولم يستجب لاتصالاتها.

يذكر أن هيثم قد ولد في 4 أبريل عام 1984 بالقاهرة، وهو نجل النجم الراحل أحمد زكي، والفنانة هالة فؤاد، وبدء حياته المهنية كممثل في عام 2006، باستكمال ما تبقى من مشاهد والده بفيلم «حليم»، والذي كان من بطولته.

 

 

هذا المحتوى مطبوع من موقع الشروق

Copyright © 2019 ShoroukNews. All rights reserved