فريدة عثمان تنعي يوسف محمد: وفاة سباح عمره 12 سنة خط أحمر 

آخر تحديث: الإثنين 8 ديسمبر 2025 - 3:02 م بتوقيت القاهرة

محمد الديك

 أعربت السباحة المصرية فريدة عثمان عن حزنها الشديد بسبب وفاة يوسف محمد سباح نادي الزهور في بطولة الجمهورية مرحلة 12 سنة، وطلبت التواصل مع اسرة اللاعب الراحل.

ونشرت فريدة عثمان بطلة مصر وأفريقيا في فيديو لها عبر حسابها بموقع التواصل الاجتماعي فيديو جاء فيه:" مساء الخير ..بعتذر جداً على التأخير لكن أنا كنت مسافرة سويسرا، كنت معزومة من الاتحاد الدولي للسباحة لمناقشة تطوير اللعبة، بس طبعا متابعة كل حاجة قلبي متقطع إننا فقدنا بطل واعد من أبطال مصر زي يوسف محمد".

وأضافت: «أنا عايزة أتواصل مع أهل يوسف علشان عايز أعزيهم وربنا يصبرهم ويربط على قلبهم".

وواصلت فريدة: « أنا إتكلمت عن التغيير والتطوير اللي لازم يحصل في السباحة المصرية لكن إن إحنا نوصل لدرجة إن ولد 12 سنة يموت في في بطولة الجمهورية دا خط أحمر، ولازم وقفة».

و قالت السباحة المصرية: «أنا تأثرت جدا لما شوفت الفيديوهات بتاعت زمايل يوسف واللي كانوا واقفين جنبه وكلنا حاسيين بالوجع اللي فيه أهل يوسف، و أنا معاهم وإن شاء الله ربنا هيجيب حق يوسف».

وأضافت والدة فريدة عثمان: «أنا عايز أضم صوتي لصوت فريدة، وأنا كأم عشت  التجربة دي معاها منذ الصغر، وقادرة افهم موقف والدة و والد يوسف حاسيين بيهم".

وتابعت: «كلنا كأولياء أمور نتعب جداً مع أولادنا لأنه دايما عايزيهم في أمن وسلام ، وإن شاء الله ربنا هيجيب حق يوسف ، وأنا وفريدة عايزين نجي نعزيكم لأن احنا حاسين بالمأساة اللي انتوا حاسين بيها».