بالفيديو.. «سائق توك توك» لـ«واحد من الناس»: حرام مصر يتعمل فيها كده
آخر تحديث: الخميس 13 أكتوبر 2016 - 11:22 ص بتوقيت القاهرة
نور رشوان
«هسألك سؤال واحد بس، دولة بها برلمان، ومؤسسات عسكرية وأمنية، و20 وزارة حالها يكون بالوضع ده إزاي؟»، بهذه الكلمات بدأ مواطن مصري، عرف نفسه بأنه «خريج توك توك»، شكواه للإعلامي عمرو الليثي، في برنامجه «واحد من الناس»، الذي يعرض على فضائية «الحياة»، مساء الأربعاء.
وأضاف: «قبل انتخابات الرئاسة كان عندنا سكر بيكفينا، ورز بنصدره، إيه اللي حصل، راح فين؟ عايزين نفهم»، متابعًا: «نتفرج على التليفزيون نلاقي مصر فيينا، ننزل في الشارع نلاقيها بنت عم الصومال، إيه اللي حصل وإيه الحل؟»، وذلك على حد وصفه.
وتابع: «الناس اللي فوق رايحيين يحتفلوا، وجايبين 38 وفد يصرفوا عليهم 25 مليون جنيه، والمواطن الفقير مش لاقي كيلو السكر في الشارع»، في إشارة منه إلى الاحتفالية التي نظمها مجلس النواب، بمدينة شرم الشيخ، بمناسبة مرور 150 عامًا على بدء الحياة النيابية بمصر.
وتساءل «هل ده يرضي ربنا؟ ده ربنا يوم القيامة هيجيب الناس، ويقول أين ملوك الأرض وحكامها، لمن الملك اليوم».
وأضاف: «طالعين في التليفزيون يقولوا مصر بتنهض، وعمالين يلموا فلوس في مشاريع قومية ملهاش لازمة، والتعليم عندنا متدني لأسفل ما تتخيل»، على حد قوله.
وتساءل «سائق التوك توك»: «إزاي عندي مواطن مش متعلم، وجعان، وصحته تعبانة أعمله مشروعات قومية زي دي، هيدخلني بيها في الحيط»، حسب تعبيراته.
وتابع «أهم 3 حاجات عشان البلد دي تنهض، هي التعليم والصحة والزراعة، لو المواطن لقى الحاجات دي مش هيقدر عليه غير ربنا».
واستكمل المواطن حديثه منفعلا: «من 100 سنة بس اليابان جت تدرس النهضة المصرية، حرام مصر يتعمل فيها كده، هل دي مصر اللي كانت مسلفة بريطانيا، تاني أكبر دولة بالعالم، عشان تعمل خط سكة جديد يبقى حالها كدة؟، هل دي مصر اللي كان الاحتياطي النقدي لها أكبر احتياطي بالعالم؟».
وتابع: «مصر دلوقتي حبة دول بالخليج بيتريقوا عليها، ويقولوا لنا بنديكوا، هل دي مصر اللي كانت تشريفًا لنا من 70 سنة كسوة الكعبة بتطلع من عندنا؟»، مضيفًا: «هل ده يليق بمصر، ومكانتها؟».
وأضاف: «مفيش حد قلبه على مصر ولا بيحبها، يطلع يقول لا حرام ده ميرضيش ربنا، شوية تجار ضحكوا على الناس باسم الوطنية والديمقراطية والعدالة الاجتماعية، وعهودهم بعيدة كل البعد عن الديمقراطية والعدالة»، مختتما حديثه مطالبًا «الليثي» بعدم قطع حرف واحد من كلامه، ليرد الأخير، قائلا: «هذيع لك كل كلمة قلتها».