اعرف بلدك.. إسلام وهيب يجوب شوارع المحروسة ليحكي تاريخ مصر

آخر تحديث: الأربعاء 15 سبتمبر 2021 - 8:58 م بتوقيت القاهرة

سهام عيد

يجوب إسلام وهيب شوارع المحروسة ليلًا ونهارًا لشرح التاريخ المصري بشكل مبسط، تحت شعار "اعرف بلدك"؛ بهدف رفع الوعي الثقافي لدى الأجيال الجديدة، وتعزيز روح الانتماء وحب الوطن.

وأطلق وهيب، مبادرته قبل عام ونصف، وبالرغم من أن دراسته كانت في مجال الهندسة، إلا أن حبه للتاريخ المصري كان أقوى، فعبر عن ذلك قائلًا: "أنا محب للتاريخ على غرار دكتور بسام الشماع، وفي نفس الوقت أنا كاتب روائي نجحت في توثيق حقب تاريخية مختلفة في مصر".

<p

ويضيف وهيب، في حواره مع الشروق: "أي تاريخ عدى على مصر أنا بحاول أعرف الناس به عن طريق إن أنا بعمل إيفينتات بننزل بنروح الأماكن الأثرية بنشرح في الأماكن اللي هناك نوع التاريخ اللي إحنا محتاجينه، إذا كان إسلامي مثلا زي شارع المعز والجمالية متحف الفن الإسلامي، أو حتى تاريخ بطلمي زي ما إحنا النهارده كدا في إسكندرية مسرح روماني ومتحف قومي مقابر كوم الشقافة كل دي آثار خاصة بفترة البطالمة، أو حتى آثار قبطية مجمع الأديان وهكذا..".

ونظم وهيب، حتى الآن حوالي 30 جولة ثقافية بمشاركة فئات عمرية مختلفة، داخل القاهرة وخارجها، مستطردًا: "بدل ما نقرأ مقال تاريخي لا.. أنا باخدكم وبنحكي التاريخ ده، هيبقى مقال على أرض الواقع نفسه هو ده اللي إحنا بنعمله".

ويتابع إسلام: "أنا حبيت أعرف الناس تاريخ مصر كله بكل جوانبه وبكل أبعاده لأن هو ده الانتماء، أنا لما عرفت بلدي كويس، وفهمت عن بلدي كويس، هو ده سبب انتمائي للبلد، وأنا لو معملتش ده مش هيبقى فيه انتماء".

وأعرب إسلام عن فخره بالحضارة المصرية ونقلها إلى الأجيال الجديدة، إذ قال إن تاريخ مصر يمثل هويته، والحضارة المصرية لم تكن من 7000 عام فقط لكنها من أكثر من 35 ألف سنة قبل الميلاد.

وتابع: "في ناس بتتمنى ربع التاريخ اللي عندنا يكون موجود في دولة تانية، احنا عندنا التاريخ ده، الفكرة بس إن اننا نعرفه كويس للأجيال الي طالعة والله هو ده هدفي ومش عايز حاجة تاني".

وعن رد فعل المشاركين، يقول وهيب: "بشوف في عنيهم الانبهار والإعجاب اللي ده لاء المكان ده عظيم، مش المكان بس اللي عظيم الدولة كلها والله، بس هي عايز يتعمل عليها سبوت مش أكتر".

ويضيف: "المبادرات هدفها رفع الوعي العام والوعي الأثري عند الناس مش أكتر من كدا احنا ممكن نستغل ده في الميديا، ممكن نستغل ده في برامج التوك شو ممكن نستغل ده حتى في تدريس المناهج بتاعة الدراسة يبقى في جزء حتى عملي إن الأطفال كل فترة ينزلوا مكان ما ويعرفوا قصته ده هيبقى شيء جميل".

ويحلم إسلام، أن تساهم مبادرته في زيادة الوعي الثقافي لدى المصريين، وأن تدعم الدولة المبادرات بشكل أكثر فعالية، وأن ينتج أفلام وثائقية عن عظمة التاريخ المصري.