الطبيبات اعتذرن.. والوزارة هددت: «اللى مش هتيجي هتتبهدل».. كواليس جديدة في حادث طبيبات المنيا

آخر تحديث: الخميس 16 يناير 2020 - 3:15 م بتوقيت القاهرة

ماهر عبد الصبور

تصدر #كفاية موت من أبناء المنيا.. و#قطار الفجر للقاهرة لازم يرجع.. صفحات أبناء المنيا، على مواقع التواصل الاجتماعي، احتجاجا على حادث طبيبات المنيا، والذي شهد مصرع وإصابة 20 طبيبة، من دفعة 2017، بسبب عدم وجود وسيلة مواصلات آمنة، وغياب قطار المنيا منذ 2010، بحجة التطوير.

وقال مجدي زناتى، المتحدث باسم رابطة أبناء بندر المنيا: "ننعي الطبيبات المتوفيات فى حادث طريق الموت (الكريمات)، وندعوا بالشفاء العاجل للمصابين، وربنا يصبر أهلهم جميعا".

ويضيف زناتي: "علشان لما طالبنا برجوع قطار الفجر من المنيا، محدش سأل فينا، وعملنا ضغط لرجوعه، ولكن لا حياة لمن تنادي، ومش عارف مكتوب علينا أهالى الأقاليم إننا نروح نخلص كل أمورنا فى القاهرة ونطوف حول الوزارات، إيه قمة الرجعية والتخلف دي؟".

واستكمل: "الوزارة بلغت إن أطباء المنيا يحضروا قبلها بيوم، ومش موفرين لهم أي وسيلة مواصلات، غير ميكروباص معفن لدكاترة محترمين، حتى مش هيلحقوا يحجزوا في القطار، والمفروض يتحركوا الساعة 3 فجرًا".

وتابع: "كان في حل بإقامة المؤتمر والتدريب على فحص سرطان الثدي في المنيا، ونوفر على الدكاترة بهدلة السفر إلى القاهرة، ولا عشان الوزارة تأخذ اللقطة؟، والغريب إن المنيا فيها مؤتمر تدريب لفحص سرطان الثدي، لكن معمول لطبيبات الفيوم! حاجه عك في عك"، حسب قوله.

ويوضح زناتى: "الأدهي والأمر من كدا إن لما الطبيبات قدموا اعتذارات وطلب بالتأجيل، أو إقامة التدريب في محافظتهم، كان رد مسؤلي الوزارة إنه هددهم "اللي هتعتذر أو مش هتيجي هيتم نقلها خارج محل عملها القريب من سكنها وتتشحطط وتتبهدل أه والله كدا".