افتتح الرئيس عبدالفتاح السيسي، رئيس الجمهورية، صباح اليوم السبت، عددا من مشروعات إسكان بديل للمناطق غير الآمنة بمدينة 6 أكتوبر، بحضور الدكتور مصطفى مدبولي رئيس مجلس الوزراء، والدكتور عاصم الجزار وزير الإسكان والمرافق والمجتمعات العمرانية، وعدد من كبار رجال الدولة والقوات المسلحة.
وحمل مضمون كلمة الرئيس السيسي، عددا من المعلومات والرسائل التي وجهها سواء للحكومة أو المواطنين حول "التعدي على الأرض الزراعية والبناء غير المخطط وآثاره علينا"، نستعرضها في الآتي:
- "قولنا إننا سنستفيد بالأراضي التابعة للحكومة أو محافظة ما أو وزارات مختلفة، وناخدها ونقيم عليها مشاريع للناس، ويكون فيها الإسكان والخدمات، وممكن تبقى فيها مناطق حرفية؛ علشان نحقق العمل بجانب الإسكان الخاص بالأشخاص".
- "دي بلدنا وإحنا عايزين نغيرها".
- "بالنسبة للوحدات السكنية التي يتم تنفيذها، أو حتى التي تم افتتاحها اليوم، كل ده بيتعمل من أموال مصر، محدش بيجيبلنا حاجة، يعني دي من عندنا من بلدنا".
- "لما عملنا الأرض دي، ماعملناش في أراضي زراعية خالص، عملناها في أرض صحراوية ميبقاش فيه مشكلة أبدا في الأمطار، ولا أي كلام من هذا القبيل".
- "أنتوا بتضيعوا الأرض الغالية أوي (الزراعية) بالبناء عليها، وتسيبوا صحراء مفتوحة جدا.. مصر مساحتها كصحراء أكثر من 90% من أرضها، ورايحين تبنوا على الأرض اللي أنتوا هتشتغلوا وتعيشوا عليها، بغض النظر عن إنها في مجرى السيل أو لاء، أنا اللي يهمني هنا، أنا أسيب الأرض دي أشتغل عليها وأسكن في الأرض الناشفة دي، هنا الترعة والمصارف واصلة ليها والمياه بتروحلها بالراحة، لا عايزة محطات رفع ولا عايزة أي حاجة".
- "وأنتوا جايين على الدائري، حجم المباني اللي موجودة ضخم جدا، وكلها بشكل غير مخطط وغير صحي للناس".
-"البناء على الأرض الزراعية، هنقول ده كان سببه الدولة، ولا الناس، ولا النمو السكاني، ولا كل ده على بعضه؟!، قولوا زي مانتوا عايزين، لكن أنتوا لازم تتوقفوا قدام النقاط دي، لأن إحنا مش هنقدر نعالج ده كله إلا بالمصريين ووعيهم".
- "لكل شخص يريد البناء على أرضه الزراعية، أنت بتاكل في أرضك، اللي هي الأرض الخضراء اللي بتطلع إنتاج وبتجيب فلوس لك ولغيرك وللبلد طبعا".
- "عايز الناس تتكلم ويبقى فيه تعبير عن الرأي.. أنا عايز الناس تتكلم بس تبقى فاهمة، فاهمة القضية اللي إحنا فيها".
- "باكرر كلامي كتير علشان أسجل مواقف على نفسي وعلى الحكومة وعلى المواطنين.. أصل القضية (البناء على الأرض الزراعية) مش قضيتي لوحدي ولا قضية الحكومة ولا قضية المواطنين، دي قضيتنا كلنا.. قضية دولة".
- "إذا كنتوا ترغبون في أن تكون دولتنا، دولة ذات شأن، فيجب على الإعلاميين والمفكرين والمثقفين والجامعات التي تدرس في علوم الاجتماع والمجتمعات وتطوراتها، دراسة اللي إحنا فيه (العشوائية والبناء على الأرض الزراعية)، وتقول نعمل فيه إيه؟".
- "هناك 30-40% -إن لم يكن أكثر- من مساحة مصر تعرضت للبناء على الأرض الزراعية".
- "لو عملنا مباني وبيوت متخططة؛ هنقدر نعملها نظام صحي لإزالة المخلفات وجمعها".
- "محدش يفهمني غلط، أنا لما بتناول معاكوا مسألة، بتناولها علشان نفهمها.. أنت لازم تكون عارف حجم القضية قد إيه وإزاي نعالجها".
- "تعاونكوا معنا كمواطنين لتقليل أي فرصة من فرص المخلفات، أو حتى الدخول في منظومة النظافة بسرعة".
- "أي قضية هاكلمكوا فيها، قضية مهتمين إحنا بيها كدولة وحكومة ومواطنين، بس لا يمكن هنقدر ننجح فيها إلا ونكون كلنا إحنا مع بعض".
- "أنتوا بتقولوا إزاي إحنا مش قادرين نعمل برنامج نظافة كويس؟ طيب أعمله إزاي؟ ده أنا علشان أعمله كويس في مصر وبرضو هتقابلني مشكلة البناء غير المخطط قدامي خيار من اتنين، يا أشوف وأسكت، يا أشوف وأشتغل.. أنا ماعرفش أسكت، وأنتوا ماتسكتوش، لازم تحلوا معايا القضية".