الصحفيون المحترمون مبيعملوش كده.. طه دسوقي: اختراق حياة الفنانين صحافة أم تحرش؟

آخر تحديث: السبت 19 أبريل 2025 - 1:40 م بتوقيت القاهرة

انتقد الفنان طه دسوقي، التغطية الإعلامية للمناسبات الشخصية للفنانين، معتبرًا ذلك يعد اختراقًا للخصوصية.

وكتب دسوقي عبر حسابه على فيسبوك: "مجرد سؤال.. معروف أن الفنان أو العامل في مجال (show business) عمله تقديم محتوى، وهو الوحيد الذي يستطيع التحدث عنه ويتلقى النقد عليه. فمفهوم وجود التغطية الإعلامية أو التواجد الإعلامي في مراحل هذا المحتوى - سواء أثناء تصويره أو أثناء عرضه أو أي شيء يخصه مثل المهرجانات وحفلات التكريم والعروض الخاصة - هو أمر طبيعي".

وتابع: "من إمتى بقى أصبح الفنان كبني آدم هو نفسه محتوى؟ ليه في تغطية إعلامية مستمرة مع الفنان في مناسباته الشخصية زي الفرح أو العزاء، والأدهش حتى أثناء الدفن؟! وليه يبقى فيه محتوى عنوانه (شاهد فلان يتزوج بنته.. فلان والدته توفيت.. شاهد معازيم فرح فلان.. شاهد انهيار الفنانة)؟ ليه؟! ليه الفنان وزوجته بيحضروا فرح صديقه ويصورهم؟".

وأضاف: "إيه المحتوى في بني آدم ماشي في الشارع مع مراته أو بيحضر مناسبة ليس لها علاقة بالفن؟ إيه الصحافة في تصوير واحد قاعد يبكي على حد فقده، مش قاعد بيصور مشهد مثلًا؟".

واستكمل: "إيه السبق الصحفي في تصوير جثمان؟ وليه أصلاً التصوير داخل المقابر؟ طبعًا مش كل واحد رافع تليفونه صحفي، لأن الصحفيين المحترمين مش بيعملوا كده".

وأردف: "ده ياخدنا لسؤال تاني: لو نزلت رفعت التليفون صورت واحد قاعد مع مراته على ترابيزة في مطعم هيقوم يكسر عضمك لأنك بالنسبة له متحرش أو متطفل، لكن لو اللي بيتصور ده فنان فاللي بيصوره - وارد يكون صحفي - وأنت راجل محبوب، وسلم على جمهورك، وقول لمراتك تعملنا باي كمان، ولا انت مغرور ولا إيه؟".

واختتم منشوره قائلاً: "فسؤالي لأصحابي الصحفيين وأساتذتي في مجال الصحافة والإعلام: لما أبقى ماشي في الشارع أو بحضر مناسبة ملهاش علاقة بالشغل وألاقي حد بيصورني ڤيديو، أتعامل معاه إنه صحفي ولا متحرش؟".