السيناريست خالد أديب: أخفيت تفاصيل فيلم مكانتش حفلة عن عمرو أديب.. وتأثير جدي عبد الحي أديب واضح

آخر تحديث: الإثنين 19 أكتوبر 2026 - 10:13 ص بتوقيت القاهرة

- أنا وأحمد الفيشاوي كنا جيران قبل انضمامه لفيلمي الأول «مكانتش حفلة»

- أميرة أديب شاطرة.. وأنا بدافع عن أي فنان شاب الناس بتتحامل عليه بدون داعٍ

كشف السيناريست خالد أديب عن كواليس تعاونه مع الفنان أحمد الفيشاوي في فيلم «مكانتش حفلة»، وتفاصيل دخوله مجال الفن وعلاقته بوالده الإعلامي عمرو أديب، وذلك خلال استضافته في برنامج «اليوم هنا القاهرة»، مع الإعلامي الدسوقي رشدي وأحمد حتحوت.

وقال خالد أديب عن دخوله مجال الفن: «الفن مبيبقاش قرار، هو بيبقى غصب عننا، ولو كان عليا كنت اشتغلت حاجة أسهل، بس هو ده اللي العالم وداني ليه، وأنا مبسوط بالقرار ده».

وأضاف عن تأثير جده على العائلة: «تأثير جدي عبد الحي أديب على العائلة واضح جدًا، وأنا بسبب سني محضرتوش، الله يرحمه، في سن واعية عشان أتكلم معاه عن السينما.. وفي فترة الجامعة عشت فترة تمردية، وكنت عايز أبقى دبلوماسي وأشتغل في الخارجية، وبعدها درست المسرح في الجامعة الأمريكية، وده شدني أكتر للفنون».

وتابع: «ابتديت أشارك كمعد في برامج، وجاتلي فرص أشتغل على مشاريع مع ناس كبيرة، لكن مكملتش، والحمد لله قدرنا نقوم فيلم "مكانتش حفلة"».

وعن تعاونه مع الفنان أحمد الفيشاوي في فيلم «مكانتش حفلة»، قال خالد أديب: «أنا أعرف أحمد الفيشاوي من زمان، وكنا جيران، وكان بيت أستاذ فاروق الفيشاوي تحتينا بدورين. وأنا عارف أولوياته الفنية، وبنتكلم مع بعض على الشغل طول الوقت، وبنحاول نشتغل مع بعض».

وأكمل: «اتفاجئت بسهولة قبوله إنه يدخل يدعمنا في الفيلم، لأنه إضافة كبيرة لأي حاجة، ووجوده بيعمل رونق، ولما تشوف الفيلم هتلاقي دوره لايق عليه جدًا، وأداه بطريقة هايلة. قلتله أنا بعمل فيلم، قالي: يلا، فين الساعة كام؟».

وكشف خالد أديب عن حرصه على عدم الكشف عن تفاصيل فيلم «مكانتش حفلة» قبل وصوله إلى الشاشة، قائلًا: «حتى مراتي بخبي عنها الشغل، عشان ما صدقتش إن مشروع هيوصل للشاشة، فمش عايز أحرق أي حاجة».

وأضاف: «قبل كده كنت بوري مشاريعي للناس، حتى ابن عمي محمد الكاتب، بس في المشروع ده حاولت محدش يبقى عارف. وخبيت محتوى الفيلم عن عمرو أديب».

وعن التغطية الصحفية للفيلم، قال: «الحمد لله التغطية للفيلم كبيرة، وشرف ليا إن مواقع بحترمها جدًا تكتب اسمي، بس للأسف ناس كتير تخلت عن حرف الألف، والفيلم اسمه "مكانتش حفلة"، مش "مكنتش حفلة"».

وأشار إلى أن هناك جولة ترويجية للفيلم من المقرر تنظيمها بعد الانتهاء من المونتاج.

وعن دعمه لابنة عمه أميرة أديب، قال خالد أديب: «أنا بدافع عن أي فنان شاب في حاله، مش مضايق حد وبيحاول يشوف شغله، والناس بتتحامل عليه من غير أي داعي. أنا على حظي إن أميرة قريبتي وزي أختي الصغيرة، وبصفة عامة أنا في ضهرها دايمًا في أي حاجة بتعملها، وتحت أمرها في أي حاجة، وأميرة شاطرة جدًا».

وأوضح سبب عدم مشاركتها في فيلم «مكانتش حفلة»، قائلًا: «الفيلم ده بالتحديد مفيهوش دور ليها؛ لأن الفئة العمرية أكبر منها».

وعن علاقته بوالده الإعلامي عمرو أديب، قال خالد: «علاقتي بوالدي زي أي علاقة أي ابن بوالده، مش بنتكلم عن الشغل، سواء شغلي أو شغله، وهو مطمئن عليا وعارف إني أقدر أفتح بيت».

وحول إمكانية اهتمام والده بالتمثيل، أضاف: «معرفش، لو هو مهتم بالتمثيل، ده شيء يرجعله».

فيلم «مكانتش حفلة» بطولة مي الغيطي وباهر النويهي، ومن إخراج ندى نصار.