ريهام سعيد ترد على منتقدي «تصريحات السمنة»: «لازم الناس تعرف إن شكلها وحش»

علقت الإعلامية ريهام سعيد، على انتقادها بسبب تصريحاتها عن المصابين بالسمنة بشكل مفرط، قائلة: «الأيام دي بتفكرني بأي فترة كنا بنعمل فيها حلقات قوية، وأنا مبسوطة جدًا إننا غايظين ناس كتير، وعملنا جراحات سمنة لناس كتير الأسبوع الماضي والستات كلهم زي الفل وصحتهم كويسة».

وقالت في مقطع فيديو نشرته عبر حسابها على موقع التواصل الاجتماعي «إنستجرام»، اليوم الجمعة، «عارفة إن فيه دكاترة وناس تانية اتضايقت والنجاح بيضايق أنا عارفة، وللمرة الأخيرة لجمهوري اللي بيحبني، لأن اللي مش بيحبني مبيتفرجش عليا، إحنا مجرحناش حد ولا اتكلمنا وحش على حد، الناس اللي اتكلمنا عنهم فوق الـ 200 كيلو وهما عبء على الدولة فعلاً لأنهم مبيشتغلوش، والسمنة لو معندكش مشاكل في الغدد أو الجينات أنت اللي جبته لنفسك ويمكن تغيره»، على حد قولها.

وعن تصريحاتها بشأن من يرتدي جلابية أو إسدال، تابعت: «دول ناس بسيطة هنقول جزء منهم أمي لازم تكلمهم بطريقة مختلفة غير اللي الناس بتقوله علشان تفوقوا، لازم الناس تعرف إن شكلها وحش ومنظرها مش لطيف ويدل على عدم التحضر، مش صح حد يقولك أهم حاجة الروح والقلب، لا صحتك أهم وشكلك ومظهرك»، على حد تعبيرها.

ووجهت رسالة لمنتقديها: «سيبونا نساعدهم ونوعيهم وننصحهم، طالما ما بتعملوش حاجة وقاعدين على الموبايل، وخليك في حالك إحنا بنعمل عمل عظيم، يعنى واحدة كتبالي في الكومنتات تحت أنتي كنتي عجلة يعني بتشتمى التخينة، وبتتريقي لأني مكنتش عجباكي، أنتو بتتريقوا عليهم ومش بتتجوزوا التخين وبتتطلقوا منهم، وبتجرحوا الناس بالكلام سيبونا نساعدهم»، وفقا لما قالته.

وطالبت جمهورها في نهاية حديثها بمشاهدة الحلقة كاملة لمعرفة الحقيقة، لافتة إلى العمليات التي أجريت للحالات التي تناولتها الحلقة والتي كانت تعاني من السمنة، وتسببت لها في مشاكل على المستوى الشخصي والعملي كثيرة جدا.

وتقدم المجلس القومي للمرأة، اليوم الجمعة، بشكوى للجنة الشكاوى بالمجلس الأعلى لتنظيم الإعلام ضد برنامج «صبايا» الذي تقدمه الإعلامية ريهام سعيد على قناة الحياة.

وتضمن موضوع الشكوى الحلقة التي تحدثت فيها مقدمة البرنامج عن السمنة والتي أثارت استياء السيدات المصريات كما احتوت على عبارات وأوصاف لا تليق بشأن موضوع السمنة، وتضمنت الشكوى المطالبة باتخاذ الإجراءات اللازمة من قبل المجلس الاعلى للإعلام فى هذا الشأن.