فيفي عبده تسأل جمهورها الدعاء بالشفاء لمحمد الصغير
آخر تحديث: الإثنين 25 يناير 2021 - 7:40 م بتوقيت القاهرة
نشرت الفنانة فيفي عبده، عبر حسابها على إنستجرام، صورة للكوافير المعروف محمد الصغير، والد المذيعة مها الصغير زوجة الفنان أحمد السقا، وطلبت من جمهورها الدعاء له بالشفاء، وكتبت: "من فضلكم ادعوا لمحمد الصغير يقوم بالسلامة وربنا يشفيه ويعافيه يا رب إن شاء الله".
واقتبست فيفي، في صورة نشرتها أيضًا، بعض الكلمات التي كتبتها مها الصغير عن والدها، وعلقت: "ياريت تقروا المكتوب في الصورة التانية عشان قصة مهمة ومؤثرة لأي حد هيقرأها بحبكم أوي، وبحبهم أوي يا رب يقوم بألف سلامة".
وكتبت مها الصغير، عبر حسابها على إنستجرام: "كل العالم يعرفها، وأكيد مش هعرف أكتب الكلام ده تاني.. أبطال القصة دي أبي وحياتي كلها، واللي يعرفني كويس يعرف أن محمد الصغير مش أبويا بس هو حب عمري، والبطلة التانية هي أعظم ست في العالم ملكة العلايلي، قصة حب عشتها على مدار كل يوم وكل ثانية لغاية اللحظة، حتى لما اتطلقوا كنت عارفة إنه بيحبها وهي بتحبه وعمري ما شفته أو شفتها سعيدة غير وهي مراته".
وأضافت: "المهم أمي اتجوزت أبويا وهي من عائلة أرستقراطية وهو من عائلة بسيطة، وتحدت أهلها وقاطعوها وهو لم يكن معاه سوى ١٠٠ جنيه، وحصل مشاكل واتطلقوا من ٢٢ سنة، ويوم ما تعب وهو حواليه ناس كتير أوي (بس في الأفراح فقط)، طلب مني أطلب أمي في التليفون وطلب يشوفها وجت له على طول، يوم ما حس أنه ضعيف أوي وتعبان بجد طلب ضهره وسنده اللي بجد مش في المنظرة وجت وطلب منها متزعلش منه وإنها تتجوزه علي سنه الله و رسوله تاني".
وتابعت "هو الآن في أمس الحاجة للدعاء لأنه في لحظات حرجة أوي أوي أوي، ادعوا له وآسفة إني طولت عليكوا".