ألقى برنامج «ورطة إنسانية»، في الحلقة الـ11 من الموسم الثالث، والذي يعرض عبر فضائية «دي إم سي»، الضوء على اتجاه البعض نحو تصوير المحتاجين أثناء توزيع الصدقات عليهم من أجل نشرها على الإنترنت.
وعرض البرنامج مشهدًا تمثيليًا لشاب وهو يطلب من المارة أن يلتقطوا له صورة مع أحد الأطفال المحتاجين، أثناء تسليمه «شنطة رمضان»، قائلًا: «مكن حضرتك تصورني عشان بديله شنطة رمضان».
بدأ الشاب في إرغام الطفل على النظر إلى الكاميرا لأجل التقاط الصورة، بقوله: «بص يا حبيبي للكاميرا، بص يا بابا، عايز أصوره صورة بالشنطة عشان أنزلها على النت».
وجاءت جميع ردود أفعال المارة مستنكرة لهذا الموقف، وأعربوا عن رفضهم لهذا الفعل بقولهم: «اللي يبدي شنط رمضان لازم يصور؟»، «اللي يعمل خير يعمله بذوق»، «أنت هتذله عشان الشنطة، خد شنطتك وامشي من هنا».
ولم يكتف البعض بالاعتراض على هذا السلوك، بل ذهبوا إلى عرض المساعدة على الطفل، وتوفير شنطة بديلة، فعلق واحد: «أنا هجيب له شنطة أحسن من بتاعتك 100 مرة».
وتوجهت واحدة أخرى إلى الطفل: «أنا هجيب لك شنطة بس متتصورش معاه، اوعدني إنك متخليش حد يذلك، ده غلط، الناس كلها مش كده»، بينما نزل شخص من سيارته ليعلن عن رفضه للموقف ويساعد الطفل.