قالت عبير أحمد، مؤسس اتحاد أمهات مصر للنهوض بالتعليم، إن هناك عددا كبيرا من المدارس بها غياب شبه تام للإشراف على الطلاب واليوم الدراسي.

وأضافت "أحمد"، في تصريحات لها، أن غياب الإشراف يتسبب في وقوع مشاجرات وإصابات وتصرفات غير لائقة بين الطلاب خاصة في "الفسحة"، مشيرة إلي وجود تدافع كبير بين الطلاب عند انتهاء اليوم الدراسي، ما يتسبب في حدوث إصابات للطلاب، خاصة الصغار على سلالم المدرسة، وكذلك حدوث مشاجرات بين طلاب المراحل المختلفة وتعدي الكبار على الصغار في بعض المدارس، مطالبةً الوزارة والمديريات التعليمية بالتشديد على المدارس في الإشراف وتواجد مشرف بكل دور بالمدرسة لمتابعة الطلاب.

وتفاعل أولياء الأمور على صفحة "اتحاد أمهات مصر للنهوض بالتعليم" عبر فيسبوك، حيث قالت ولية أمر: "ابني في مدرسة خاصة بالمنصورة، وكام مرة ييجى مضروب من أولاد أكبر منه فى السن، ووضع الإشراف سيئ والأولاد بيضربوا بعض ومحدش بيقولهم أنتم فين بالرغم من إنها مدرسة خاصة، ولما نتكلم يقولوا الكثافة عالية، وطبعا الكثافة ارتفعت فى الـ٣ سنوات اللى فاتت بسبب المحافظ اللى كان موجود، كل ما المدير يرفض حد، ولى الأمر يجيب تأشيرة من المحافظ والمدير يقبله، والفصول عدت ٧٠ طالب فى الفصل وأصبحت مثل الحكومى كمستوى، وابنى كان مرة عينه هتروح لولا ستر ربنا".

وأضافت ولية أمر: "والله حضرتك احنا في مدرسة حكومية، أول الترم ما ابتدى ولا فيه إشراف ولا أي حاجة، والميس كمان بتسيب العيال في الفصل لوحدهم وبتوقف عليهم عيال من ٦ ابتدائي وتنزل معرفش بتروح فين والعيال في المرواح بتبقى مدعكة، واللي بيقع يدوسوا عليه وحاجة آخر إهمال"، وتابعت ولية أمر أخرى: "لا للأسف الإشراف شكليا موجود لكن فعليا لا، الولاد الصغيرين بيتضربوا من اللي أكبر منهم ولما بيشتكوا للأخصائية أو للمديرة مش بيتم التعامل مع الشكوى إلا بوجود ولي الأمر، ابني في أولى ابتدائي وجالي مسحول قبل كدا، وكل يوم يحكيلي عن أصحابه اللي بيتضربوا من ولاد أكبر منهم وطبعا في المرواح حدث ولا حرج، لولا أنى بقول لابني يستني في مكان معين كان زمانه اتهرس، مفيش نظام ولا اهتمام بالأطفال الصغيرة خالص".

واستكملت ولية أمر أخرى: "يعني اسمحوا لي إني أتدخل، أنا شايفة إن معظم الشكاوى إن الطلاب هما اللي بيعتدوا على بعض بالضرب، لو البيت اهتم أنه يعرف ابنه أن دي مدرسة مش ساحة فرد عضلات، المدرس هيعمل إيه ولا إيه، أصلا المدارس المفروض يكون فيها مشرفين وتبقى دي شغلتهم"، وقالت أخرى: "إحنا فى مدرسة تابعة لإدارة عين شمس التعليمية، ماعندناش وجود أصلا لمشرفين دور والنتيجة طبعا خناقات بين طلبة الإعدادى والثانوى، وآخرهم خناقة كانت كارثة بين الطلبة، وكان فيها إصابات، ودى كمان مدرسة مشتركة وفيها أطفال من كى جى وابتدائى وممكن يتأذوا".

وفي المقابل قالت ولي أمر أخري: "اللهم لا حسد، مدرستنا إلى حد ما الإشراف فيها على أكمل وجه، وفيه كثافة عددية مع الطلاب وفيه اهتمام فعلا من أول حصانة Kg لحد الإعدادى، من أول دخول الطالب من باب المدرسة حتى وقوفه فى الطابور إلى صعوده ونزوله للفسحة حتى نزوله أثناء الحصص للمعامل والألعاب فى الفناء حتى خروجه، بجد أجمل وأحسن حاجة فى مدرستنا النظام والإشراف أمانة".