ما تقلقش
لما تشوف الصراع والمنافسة على مسح الجوخ
وتسمع الكذب بيتقال عيني عينك.
ما تتألمش..
لما بتشوف التعالب بتسمن الفراخ وبتلعب معاها
وهم بيشاوروا عليك ويقولولهم حرامي الفراخ اهو.
ما تشكش..
لما تلاقيهم بيحاولوا يفهموك إن الإنسانية موضة قديمة
وإن فيه أسياد لهم الحق في الجاه والثروة والمناصب
وفيه عبيد انكتب عليهم يخدمو الأسياد
ما تزعلش..
لما يتهيألك إنك لوحدك أو إنك أقلية
افتكر كويس إن الكبير قوي
متمدد وساكت
عملاق رهيب
الدبان والهاموش اللي بيضايقك مش هو اللي بيحكم حركته
أو يأثر عليه
في الساعة المحتومة
بتيجي لحظة
محدش بيكون متوقعها
بيفتح عينيه ويتمطع
بينفض جسمه نفضة واحدة قبل ما يقوم
نفضه واحدة..
بتغير المشهد كله في لحظة
بعدها..
الكل بيتوحد مع جسم الكبير
ويتحرك معاه
العملاق ممكن يسكت للحظة
لكن بيدهشك..
لما كفه بتنزل مرة واحدة
وصوتها يزلزل العالم
افتكر كويس..
لما عملها من سنين
هل انت كنت عارف؟!
هل التعالب كانت عارفة؟!
هو كده..
بيتحرك من غير إنذار
فاكر ساعتها حصل إيه؟
والناس اتغيرت ازاي؟
والتعالب قالت إيه؟
فاكر الهيستريا اللي خلتهم يلفوا حوالين نفسهم
ويجروا يولولوا في الإذاعة والتليفزيونات:
"مش احنا ..
ما كناش معاهم..
أحنا معاك يا كبير..
والنعمة معاك"
فاكر الفزع في عينيهم وهم بيضربوا تعظيم سلام
ويوطوا يبوسوا الأيادي
كل ما ييجي إسم الشعب أو الثورة أو الشباب
فاكر.. "يا شعب مصر العظيم"؟
فاكر.. "نحيي ثورة يناير المجيدة"؟
ما تقلقش من التفاصيل اللي مغرقة المشهد
تأكد إن العملاق اللي عاش آلاف السنين
مش هيموت في كام شهر أو كام سنة
ده مش أمل مزيف..
دي طبيعة الكون
المارد..
ما حدش يقدر يهزمه
مهما التعالب تجاهلته واتعامت عن جبروته
افتكر دايما
الأصل.. هو الأصل
والهاموش بيفضل هاموش
ولما ييجي الوقت
مش هتسمع كف واحد
بدل الكف هيبقوا مية.. هيبقوا ألف..
أصبر
عمره طويل
عاش كتير وهيعيش ياما
ومش مستعجل زيك
لما بيتحرك
بيختار الوقت بحساباته
اللي محدش يعرف هو بيعملها ازاي
كل سنة وانت طيب
وقلبك نضيف
وعالمك جميل
كل سنة
وثورتك بخير