علق الإعلامي محمود سعد، على خروج المنتخب الوطني من بطولة كأس الأمم الإفريقية، بعد خسارته أمام منتخب جنوب إفريقيا، قائلًا: "ماتش إمبارح كان حاجة غريبة جدًا، أنا مكنتش فاهم فيه إيه؟".
وأضاف خلال تقديمه برنامج "باب الخلق" المذاع عبر فضائية "النهار"، مساء اليوم الأحد: "بعد الماتش كان فيه حالة صدمة وذهول وحيرة، وده خلاني فكرت لما عمنا أحمد رامي كتب (مجروح وضامم جناحه على اللي فيه) والناس متضايقة قوي مش عارفين يعملوا إيه في مين، الحاجات بقت كتير قوي الله يكون في عون الناس".
وتابع: "أنا مليش في الكورة، لكن ليا في مصر، أنا زعلان عشان خسرنا لكن خسرنا ليه؟ أظن هي العزلة والوحدة وإن محدش فينا حاسس بالتاني، والناس كانت في منتهى الغضب المكتوم، لكن لازم تبقى فاهم إيه اللي حصل؟".
وعقب: "كل واحد بيتصدر لقيادة شيء في بلدنا، لا بد أن يدرك إن الحياة خشنة بما فيه الكفاية، الحياة أصبحت مسامير البني آدم عمال بيدوس عليها، طول ما هو ماشي بتخبط في وشه، خروج حزين مش مفهوم، فإذا كنت أنا مش هقدر أفرح الناس بحاجات معينة، لازم تكون فيه حاجات تانية الناس تفرح بيها".
وخرج المنتخب الوطني من بطولة كأس الأمم الإفريقية المقامة على أرضه، بعد خسارته أمام منتخب جنوب إفريقيا بنتيجة 0-1.