علق السيناريست عمرو محمود ياسين، على الجدل المثار مؤخرا، عقب انتشار أخبار اعتذار المطرب رامي صبري عن غناء تتر مسلسل "وننسى اللي كان"، وما تبعه من اتهامات طالت الفنانة ياسمين عبد العزيز.
وقال عمرو محمود ياسين، في رسالة مطولة عبر حسابه بموقع فيسبوك: "حقيقي أنا مش مصدق اللي بيحصل مع الفنانة ياسمين عبد العزيز، لو تتر اتغير من حاجة لحاجة يبقى ياسمين، لو ممثل أو ممثلة قال جملة معينة يبقى ياسمين، لو حد لابس لبس معين يبقى ياسمين، لو شخصية متسمية اسم معين يبقى ياسمين، وأقسم بالله إن ده غير حقيقي؛ لأن المسلسل له مؤلف ومخرج ومنتج وستايلست وأقسام تخصصية".
وأضاف: "إحنا مش هواة، إحنا بنشتغل، وكل واحد فينا بيحترم دور الآخر، وكل واحد مسؤول عن اختصاصه ودوره في العمل. أكيد بنتشاور وبنفكر مع بعض علشان نوصل لأفضل قرارات في مصلحة المشروع، بس الموضوع كله تصفية حسابات للأسف الشديد".
وتحدث عن الضغوط التي تتعرض لها ياسمين عبد العزيز قائلًا:
"هي بقت مش عارفة تعمل إيه، لما تطلع ترد الناس تقول لها بتردي ليه، ولما تسكت الناس بتصدق الاتهامات".
وتابع: "حقيقي أنا بشفق عليها، لكن اللي بيخليني أهدى إن ياسمين قوية جدًا جدًا، وبتقابل ده كله بسخرية وضحك، وبترد تقولي أنا مش شايفاهم، بس أنا متعود أواجه، والناس اللي بتتابعني عارفين عني ده".
وأكد عمرو محمود ياسين، أن الهجوم على ياسمين يمس العمل كله، قائلًا: "لازم الجمهور يعرف الحقائق، لأن أنا بعتبر الهجوم على ياسمين هو جزء من الهجوم على مشروعي، اللي كلنا بنبذل فيه مجهود كبير جدًا".
واختتم رسالته بقوله: "ربنا يصلح حال الجميع، وخالص التقدير والاحترام للجميع".
يذكر أن مسلسل "وننسي اللي كان" من تأليف عمرو محمود ياسين، وإخراج محمد الخبيري، وبطولة ياسمين عبد العزيز، وكريم فهمي، ومنة فضالي، وشيرين رضا، ومقرر عرضه موسم رمضان المقبل على قنوات ام بي سي مصر.