تعرض الفنان محمود العسيلي، لهجوم شديد من قبل جمهوره ومحبيه؛ وذلك بعد التغريدة التي هاجم فيها شباب الشعراء والملحنين الذين يرسلون له أغان على تطبيق «واتس آب»، مهددًا إياهم بوضعهم في قائمة «البلوك»؛ بسبب عدم احترامهم لخصوصيته.
وكتب «العسيلي»، في تغريده جديدة له عبر حسابه على موقع «تويتر»: «واضح من رد الفعل على التويتة الأخيرة إن الناس مبتفهمش يعنى إيه خصوصية بنى آدم، ومش فاهمين بردو الفئة اللى أنا باتكلم عليها من الناس اللى بتطاردك على تليفونك والواتس آب بتاعك بشكل جنوني، وطلعت أنا جالد المواهب الشابة ومغرور وتنك وشايف نفسى ومدعي».
وتابع: «كتير نصحوني إني مردش، خصوصًا بعد الكم الرهيب من قلة الأدب والسفالة والسواد اللي شوفتو فى الريبلايز، عمر ما كان الجري ورا حلمك يخليك تعترض خصوصية غيرك بالشكل دا، وده اللي خلاني أكتب التويتة الأولانية، عارف إن الموضوع صعب بس فى طرق تانية توصلك».
واختتم حديثه: «الحمد لله رب العالمين، أنا أى حد موهوب بجد وبيوصلي شغله بطريقة محترمة بجد، بحاول أساعده وأقوله رأيي وأشوفله سكك مختلفة حتى لو شغله مش مناسبنى فنيًا، وعلى فكرة الميل بتاعي موجود وبرد عليه وحطه هنا وعلى الانستجرام وشكرًا».