دروس قناة السويس «الجديدة» - حسام السكرى - بوابة الشروق
الثلاثاء 1 ديسمبر 2020 7:08 ص القاهرة القاهرة 24°

احدث مقالات الكاتب

شارك برأيك

هل تؤيد فرض غرامة فورية على عدم ارتداء الكمامات بوسائل النقل العام؟

دروس قناة السويس «الجديدة»

نشر فى : الأحد 16 أغسطس 2015 - 8:20 ص | آخر تحديث : الأحد 16 أغسطس 2015 - 8:20 ص

ــ بصوا يا مسئولين. أنا جمعتكم هنا علشان الأوضاع بقت صعبة. المصريين تعبانين. إحنا عملنا إنجاز بحفر القناة الجديدة فى الميعاد ولازم نعمم التجربة. فين المسئول عن المحافظين؟
ــ تحت أمرك يافندم
ــ بلدنا بقت وسخة والزبالة فى كل الشوارع. دى مسئوليتكم. تنضفوها فى قد إيه؟
ــ إدينى شهر.
ــ الشغل القديم أنا عارفه. مش عاوز النضافة بتاعة المواكب. أنا عاوز منظومة كاملة، للجمع والفرز والاستثمار وإعادة التدوير. فيه دول بتشترى مخلفات علشان تستغلها.
ــ يافندم ده موضوع مش سهل وبياخد وقت. هيحتاج سنتين على الأقل.
ــ معنديش سنتين. أشوف عشر محافظات يدخلوا المنظومة كل ست شهور.
ــ بس يافندم..
ــ مافيش بس. قناة السويس الجديدة عملناها فى سنة بدل تلاتة. لما احتجنا خبرات جبنا شركات من كل الدنيا. مصر قد الدنيا وبكرة تنضف زى بقية الدنيا.. وانت.. مش انت المسئول عن صحة الناس؟
ــ أيوه يافندم.
ــ عاوز إصلاح شامل للمنظومة الصحية. مش معقولة المستشفيات ترمى الغلابة فى الزبالة. دكاترة مصر ماليين الدنيا كلها ومشغلين مستشفياتها. اتصلوا بيهم وشوفوا نظامنا يتصلح ازاى. محتاج قد إيه وقت؟
ــ محتاجة دراسة لكن تقدير مبدئى خمس سنين.
ــ أنا عاوز خطة وتخلص كل مصر فى سنتين. القطاع الهندسى هيساعد ويبنى، الخارجية هتسهل لكم التواصل مع علماء مصر ودكاترتها. لو احتجتوا فلوس احنا أخدنا معونات من الخليج وراكنينها على جنب، وكمان عندنا قطاعات إنتاجية بتكسب وشايلين فلوسها. مش عاوز مصرى واحد يعانى وعاوز العلاج هنا يكون أحسن من العلاج فى أى حتة فى الدنيا. فين المسئول عن التعليم.
ــ موجود يافندم
ــ يعنى إيه طالب يجيب سبعة وتسعين فى المية فى ثانوية عامة وما يدخلش مرحلة أولى؟! على أيامى كانوا بيدخلوا طب بخمسة وتمانين.
ــ يافندم أولياء الأمور بيشتكوا لو الولاد جابوا درجات ضعيفة. فضلنا نرفع الدرجات علشان نبسطهم لحد ما الأكترية بقت بتطلع فوق التسعين فى المية.
ــ عملتوا تضخم فى التعليم؟ ده كلام فاضى. الإيكونومست كتبت أن عندنا تالت أسوأ تعليم ابتدائى فى العالم، والجرايد بتقول إن ولادنا ما بيعرفوش يقروا ولا يكتبوا. عملت إيه؟
ــ يافندم ماهو.. أصله صعب..
ــ عارف إنه صعب بس هنبدأ إمتى؟ اتقوا الله. الفنلنديين واليابانيين عرضوا المساعدة. شوفوا تطوير التعليم والمناهج والمدارس محتاج إيه وتبدأوا من بكرة. عاوز وقت قد إيه؟
ــ ستة..
ــ اتنين..
ــ ماشى يافندم..
ــ وانت.. انت المسئول عن الأمن والمعتقلين اللى ماليين السجون..
ــ أيوه يافندم.. ادينى ساعتين زمن..
ــ ساعتين ليه؟
ــ طب اعمل تليفون سريع وخلصها فى ساعة؟
ــ ساعة إيه وساعتين إيه؟ أنا عاوز مراجعة لكل المعتقلين والمحتجزين. أى حد سجنتوه احتياطى وماقدمتوش أدلة فى خلال اربع اسابيع يخرج فورا
ــ يا فندم احنا عندنا ناس بقالها اكتر من سنتين
ــ لو مش عارف تجمع أدلة يطلعوا براءة فورا. مش هاسمح ان حد من المصريين يقضى فى السجن يوم وهو مظلوم. تراجع قوايمك وتشوف أدلتك فى قد إيه؟
ــ ست شهور؟
ــ معندناش كده.. أسبوعين..

التعليقات