توجه المخرج عمرو سلامة مخرج فيلم «صنع في مصر» بالشكر للممثل الذي شارك أحمد حلمي البطولة، وقام بالأداء التمثيلي لدور دب البندا.
وقال سلامة، خلال رسالته التي وجهها عبر صفحته الرسمية على «فيسبوك»، اليوم الخميس: «عايز أقول إن في فنان عبقري اسمه محمد سلام الفنان العظيم ده هو من أكثر الناس اللي تعبت في فيلم سلام هو المحرك للباندا وكان لابسها طول الفيلم».
وأضاف مخرج فيلم «صنع في مصر»: «الموضوع كان صعبًا جدًا، الباندا ديه لو في عز الثلج، بعد ما أي حد يلبسها دقيقتين بيشر عرق من كثر الحر جواها بسبب الحجم وكمية الفرو، وإحنا كنا بنصور معظم الفيلم في عز الحر سلام خس في الفيلم لدرجة إن وزنه بقى أقل من ٥٠ كيلو عمره تقريبًا ما اشتكى وكان بيصور في ظروف صعبة وكان ممكن يعيد تصوير اللقطة للأبد».
وأشار عمرو سلامة إلى أنه «بعيدًا عن إنه شخص جميل، وتعب، هو كان فاهم التحريك بالظبط، فاهم تمثيل، فاهم نوع الفيلم ونوع التحريك اللي كنا محتاجينه، وفوق كل ده، المشهد كان بيتمثل قدامه من الفنان أحمد حلمي علشان هو يحاول يطلع نفس أداؤه بالضبط».
فيلم «صنع في مصر» تأليف مصطفى حلمي، وإخراج عمرو سلامة، وبطولة ياسمين رئيس، ودلال عبد العزيز، ومن المقرر عرضه أول أيام عيد الفطر المبارك.