خرج بيتر ميمي مخرج مسلسل "الحشاشين" عن صمته ليرد على الانتقادات الموجهة للعمل، موضحا بعض الأمور التي غفل عنها المشاهدين، ومنها إن المسلسل من وحي التاريخ، إلى جانب تعريفه "الإسكندرية مدينة في مصر"، وذلك لوجود عدة مدن تحمل نفس الأسم.

وكتب بيتر ميمي عبر حسابه على موقع "فيسبوك": "طيب كل سنة وأنتم طيبين.. مع إني مكنتش حابب أتكلم علشان دول كلهم 4 حلقات!.. مبدئيا المسلسل من وحي التاريخ وده مكتوب نصا في التترات يعني مش وثيقة تاريخية لكنه دراما تاريخية".

وتابع: "هو تارنتينو لما قتل هتلر في السينما كان حقيقة؟ أو نابليون فى فيلم ريدلي سكوت الأخير هل ده نابليون اللي في كتب التاريخ؟ ديه دراما تاريخية.. حاولنا نعمل خيال تصويري لفترة من الفترات لكن في شكل درامي.. لكن رجعنا في الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية".

وأضاف ميمي: "هل ده حسن الصباح؟ مفيش كتاب اتفق على حسن الصباح لان المغول حرقوا القلعة وكتبه وأفكاره والمجهود اجتهاد.. ماركو بولو أو فلادمير بارتول أو برنارد لويس أو فرهاد دفترى.. وكتير جدا.. حسن الصباح كان بيعمل معجزات؟ لا طبعا!!! وده تباعاً مع الحلقات هيتفهم".

وأوضح بيتر: "الحشاشين مسلسل تاريخي بالعامية المصرية.. الأحداث بيت أتراك وفرس.. لما عملوه الأتراك اتكلموا تركي ولما عملوه الامريكان بيتكلموا انجليزى.. احنا عاملينه في مصر والترجمة موجودة في كل بلد.. المسلسل بيتعرض في روسيا وأمريكا وأكتر من بلد، كل بلد بلغتها..هم الڤيكنجز كانوا بيتكلموا إنجليزي؟ ولا ويليام والاس كان بيتكلم اللكنة الأمريكية".

واستكمل حديثه: "ليه حسن الصباح؟ حسن الصباح شخصية فذة وغريبة ومستفزة إنك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا في منتهى الشر لكنهم شخصيات فذة غيرت العالم .. أو على مستوانا المصري خط الصعيد أو سفاح إسكندرية".

وأوضح بيتر ميمي: "حاجات صغيرة.. أم الخليفة رصد كانت نوبية الأصل، إسكندرية مدينة في مصر لأن فى مدن كتير باسم إسكندرية حوالين العالم.. لزم التوضيح للترجمة لأن فيه غير مصريين بيتفرجوا على المسلسل، مجاعة القاهرة الفاطمية مثبوتة تاريخيا لكن تعددت أشكالها حسب المصادر وهي على فكرة كانت قبل وصول حسن بفترة مش بعيدة بس ديه دراما (من وحي التاريخ)، ماتسمى بمعجزات حسن الصباح مقصود تتصور بالشكل ده و ده هيبان تباعا و خصوصا مشهد الراوي حلقة ٨، عم ملك شاه اتقتل بوتر القوس لان ده كان عرف و تقليد".

واختتم: "مين الست اللي بتظهر لحسن الصباح؟ ده في حلقة 30 بقى لو ربنا ادانا عمر.. كل سنة وأنتم طيبين وسعيد إن المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل افضل وأكبر وأحسن من اللي احنا عاملينه.. ومع الوقت ننافس.. سنغزو العالم".