استنكر الإعلامي عمرو أديب، حديث البعض عن خلافات الفنان هشام سليم مع أهله بعد وفاته، معقبًا: «ليه مبقيناش نعرف نسيب الناس تموت في سلام؟ لو حد مات يجوز عليه الرحمة، قولوا الله يرحمه ونقطة».
وقال خلال تقديمه لبرنامج «الحكاية»، المذاع عبر فضائية «mbcمصر»، مساء السبت: «جرا لكم إيه بقيتوا متوحشين ليه؟ الحكم على الرجل اللي مات هيفيدك في إيه؟؟ هشام سليم توفى وسط أهله ومشكلاته مع إخوته حُلت، والرجل مريض منذ عامين».
وتساءل عن الفارق في حياة المواطن إذا علم بأن هشام سليم كانت لديه خلافات مع أهله من عدمه، مضيفًا: «بنعمل في بعض كده ليه يا جماعة؟ أنا خايف أموت والله، هتعملوا فيا إيه لما اموت؟ أنا هيتعمل لي حفلة غير طبيعية.. مش عاوز أموت خوفًا من الموت، ولكن خوفا من اللي بتعملوه».
ونوه إلى أنه تحدث اليوم إلى مجموعة من أقارب الفنان الراحل، والذين تساءلوا عن سبب خوض الناس في أعراضهم بهذا الشكل، متسائلًا عن الأهمية عندما يعلم المواطن عما إذا كانت أخت «سليم» تتواصل معه أم لا، وعما إذا صلى أخوه عليه أم لا.
وناشد المواطنين قول «الله يرحمه» وقراءة الفاتحة على روح هشام سليم، وخاصة أنه كان رجلًا محترمًا، مضيفًا: «لو سمحتم لما أموت قولوا الله يرحمه وبس، الراجل بعد موته عند ربنا، في إيد الرحمن الرحيم يا ظلمة يا اللي مبترحموش حد، يا اللي بتاكلوا لحم الناس الميتيين، اتقوا الله وخلوا عندكم رحمة»، بحسب تعبيره.