وقالت نهاد عن «حالة خاصة» خلال مقطع فيديو على فيسبوك، "جميل إن يبقى في مسلسل بيتكلم عن حد عنده احتياجات خاصة، يعني شاب محامي عنده توحد ونفسه يبقى محامي، حلو، لكن إننا نتكلم على مسلسل شاب متوحد فنهتم جدا بالتوحد وأي حاجة تانية مش مهم ده أمر غريب".
وأضافت: «مبدئيا كده محاميين تحت التمرين، ازاي المحامية تجيب صاحبة المشكلة وتقعدها على الترابيزة وهما كلهم قاعدين ونقولها تقول أسرارها على العلن، ونفرض عليها أنها تتكلم ونقولها أن المحاميين اللي تحت التمرين دول اللي هيخلعوكي وهيحلوا المشكلة، ده ضد مهنة المحاماة تماما، في حاجة اسمها خصوصية، يعني إيه أجيب موكل أنشره قدام 6 شباب تحت التمرين لسه بيتعلموا، حتى متعينوش في المكتب، ده بيسموه انتهاك شديد لقيم وأخلاق مهنة المحاماة، يعني المواطن اللي تعرض لموقف مشابه من حقه يرفع عليهم قضية».
واستكملت: «تاني حاجة خلع إيه اللي بيعملوله استخبار، 6 نازلين يتحروا ويصوروا الراجل جوز الست وبيقولولها عايزين تقرير طبي منك إنك لسه بنت، خلع إيه اللي بتعملوله الكلام ده جبتوه منين، الخلع عندنا الست بتتنازل عن كل حاجة عشان تخلص من الراجل ده، والست مبتقولش أسباب أصلا، امتى بنقول أسباب لما نعمل طلاق للضرر».
وتابعت نهاد: «من حيث أخلاقيات المهنة في مشكلة في المسلسل، ومن حيث الموضوعات وطريقة تناولها قانونا في تضليل للمجتمع، هاتوا محامي يراجع معاكوا القرارات، حاجة كمان، القضية الجنائية التي من الممكن أن يتم الحكم فيها بالإعدام، لسه بنقعد نتناقش فيها قبل الجلسة، ومحامي يجيبلي بـ(برشامة) قبل المرافعة، ينهار أسود وتقولولي أكبر مكتب محاماة في مصر، ولو مجتش البرشامة كانت هتعمل إيه».
ووصفت نهاد أبو القمصان شخصية «عز» التي يقدمها الفنان حسن أبو الروس، خلال مسلسل «حالة خاصة» بالمتحرش، نظرا لطريقة حديثه مع المحامية التي يتدرب في مكتبها، قائلة: "في محامي يتجرأ على استاذته بهذه الطريقة"، متابعة: "بنتي قالتلي هو في صاحب مكتب محاماة مهزأ كده يسيب حد يكلمه بالأسلوب ده"، متسائلة: «نقابة المحاميين فين من الكلام ده».
ويتناول مسلسل «حالة خاصة» قصة شاب يعاني من التوحد، ويريد أن يعمل في مجال المحاماة، ثم يذهب لمكتب المحامية أماني النجار، التي تفتح فرصة في مكتبها لتدريب 6 شباب، وتقرر أن تعطيهم فرصة لمدة شهر للمشاركة في حل قضايا المكتب، وتترك لهم الصلاحيات للبحث عن حلول لكل قضية يأتي عليها الدور في المكتب.