قال الإعلامي إبراهيم عيسى، إن مناهج التعليم في مصر تسببت في مسح شخصية الأفراد، مضيفًا: "بتحفظ الكلمتين اللي هترميهم في الامتحان، وتاخد الشهادة، فيتحول التعليم لشهادة، ويتحول العقل اللي بيذاكر لعقل بيحفظ ويصم ويدلق على ورق الإجابة".
وأضاف «عيسى»، في برنامج «مع إبراهيم عيسى»، المذاع على فضائية «القاهرة والناس»، مساء أمس الإثنين، أن الأصل في التعليم قديمًا كان الكتاب المدرسي، لكنه تحول مع الوقت إلى الكتاب الخارجي، والملخصات، ونماذج الامتحانات، ونماذج الإجابات.
وأشار إلى أن مناهج التعليم تتعامل مع الطالب من منطق أن يحفظ فقط، ومن ثم يحصل على الشهادة، قائلًا: "نسبة اللي مبيعرفوش يقرأوا ويكتبوا ومعاهم شهادات ودبلومات 80%، ولو ركبت المترو ومليت 4 جمل للركاب مش هتلاقي 5 بيكتبوا صح".
وأكد أن "العقلية المصرية أصبحت لا تناقش ولا تدرس، ورحلة التعليم منذ الصغر وحتى انتهاء التعليم الجامعي تلغي العقل تمامًا"، لافتًا إلى انخفاض قدرة الأفراد من مختلف الطبقات على التركيز بشدة، وأن درجة التركيز أصبح لها قدرة محدودة على الصبر.
وتابع: "المدرس يقولك بلاش لماضة، والأهل يقولولك عملت إيه في الامتحان، وأنت تستبيح الغش؛ لأن التعليم كله فيلم أونطة، والشباب دلوقتي عايز اللي يقصر، ويلخص، ويجيب من الآخر، ويقرأ الكام حرف بتوع تويتر، ويشوف 3 دقايق من الحلقة، ويقرأ العناوين بس من الجرائد والكتب".