أطلقت وزارة الأوقاف خلال الفترة الماضية، حملة "صحح مفاهيمك"، لتصحيح السلوكيات الاجتماعية والمفاهيم الدينية الخاطئة المنتشرة في المجتمع، وتناول الظواهر الخطيرة التي تهدد الشباب والمجتمع.
تحذير بعد حادث مأساوي
وتناولت الحملة بعد حادث الطريق الإقليمي الذي أسفر عن عدد من الضحايا والمصابين، في منشور جديد ضمن مبادرة "صحح مفاهيمك" على جميع صفحات الوزارة على مواقع التواصل الاجتماعي، لتحذير السائقين وتوعيتهم بخطر القيادة.
سلوكيات مرورية خطيرة تهدد الأرواح
وقالت الوزارة في منشورها: "في ناس كتير بتتعامل مع السواقة كأنها حرية مطلقة، يمشي بسرعة، يقطع الإشارة، يتجاوز في أي وقت، وكأن الطريق بتاعه لوحده. وبعضهم فاكر إن السرعة شطارة، وإن اللي بيسوق على مهله "بيعطّل الدنيا". وفي وسط الزحمة دي، بننسى إن لحظة تهور ممكن تخلّي إنسان بريء مايرجعش بيته تاني، وإن استعراض القوة على الطريق ممكن يكون سبب في مأساة عمر كامل".
قطع الإشارة.. جريمة لا مبرر لها
وتابعت الوزارة: "من أكتر التصرفات الخطيرة اللي بنشوفها كل يوم: قطع الإشارة بحجة "الإشارة فاضية"، أو "الطريق مافيش حد"، أو "مافيش ظابط واقف"، وكأن الالتزام بالقانون اختيار. ناسيين إن مخالفة الإشارة مش بس مخالفة مرورية، دي جريمة ممكن تقتل نفس".
استشهاد بالقرآن والسنة
واستشهدت الوزارة بقول الله تعالى: {وَلَا تُلْقُوا بِأَيْدِيكُمْ إِلَى التَّهْلُكَةِ}، وقال أيضًا: {وَلَا تَقْتُلُوا أَنفُسَكُمْ}، مشيرةً إلى أن النبي ﷺ علّمنا كفّ الأذى ومراعاة الناس، وقال: "كلكم راعٍ وكلكم مسئول عن رعيته".
مفاهيم خاطئة تقود للكوارث
وتابعت: "المشكلة الأكبر إن فيه مفاهيم غلط مترسخة: اللي يقول "أنا سايق كويس ومليش دعوة بغيري"، أو "أنا حافظ الطريق"، ويمسك الموبايل وهو سايق، وده ناتج عن غياب الوعي بأن الطريق مش مجرد مساحة بنمشي فيها، ده ميثاق أمان بيننا كلنا، وأي خرق ليه ممكن يكون تمنه غالي جدًا. والالتزام مش خوف من العقوبة، ده التزام أخلاقي وديني، واحترام لحياة الناس".
القيادة الآمنة مسؤولية الجميع
وشددت الوزارة على أن: "القيادة الآمنة مش ضعف، ولا التزامك بالقانون معناه إنك مش فاهم أو مش جريء. بالعكس، دي شجاعة حقيقية، ووعي، وتحضّر. خليك قدوة في سواقتك، وسُوق كأنك شايل أرواح على كتفك، لأنك فعلًا كده. حياتك مش ملكك لوحدك، وحياة غيرك أمانة في رقبتك. وربنا يحفظنا جميعًا، ويجعلنا من الناس اللي لما تمشي في الدنيا تخلّيها أأمن وأطهر".