ــ ما يصحش كده! دى مصيبة! قيم مهنتنا راحت. أنا مش مصدق. مشاهد فاضحة على التليفزيون؟!
• تخيل؟ مفيش ولا مشهد واضح. انعدام المهنية وصل لدرجة إنهم يطلعوا صور مهزوزة و«مبكسلة» وصوت سيئ وإخراج ردىء. بذمتك ده خالد يوسف؟ مفيش مشهد واخدينه عدل! والا الصوت..
ــ بتتكلم جد؟! الصوت هو اللى مزعلك؟!
• والصورة كمان. التليفزيون صورة فى المقام الأول، وإلا كنا كتبنا مقال ونشرنا الفضيحة فى جرنال.
ــ طب والانتهاك؟ مش قلقان من انتهاك حرمة المواطن؟
• أى مواطن؟ ااااه المواطن!! اللى بيطلع فى الدستور؟ لا ده طموح.
ــ الدستور طموح؟
• لأ.. المواطن طموح. موجود فى الدستور والخطابات السياسية، لكن مش فى الواقع. زى الوطن بالضبط. طموح برضه.
ــ حيرتنى معاك. يعنى انت مش سعيد بالهبة القوية لبرامج التوك شو وإدانتها للمذيع والبرنامج؟ مش فرحان بوقفة الإعلام مع حق الناس فى الخصوصية؟
• قصدك حق المشاهير والمرضى عنهم. انت نسيت برنامج الصندوق الأسود وتشهيره على مدى شهور بالمغضوب عليهم من الضالين عن طابور الاصطفاف؟! كانت فين الهبة؟! إحنا الناس الوحشة عندنا مالهاش حق لا فى الخصوصية ولا فى غيرها.
ــ مين الناس الوحشة؟
• أى حد غير الناس الحلوة.
ــ انت بتتجاهل ان برنامج الصندوق الأسود اتقفل بسبب انتهاك الخصوصية.
• ما حصلش. البرنامج اتوقف لما أعلن عن نية انتهاك خصوصية الملياردير الكبير. انتهاك خصوصية البشر العاديين لا بيعمل مشكلة ولا هبة ولا حاجة. ولك فى برنامج صبايا الخير عبرة.
ــ ما هو ده كمان اتوقف، والقناة اعتذرت.
• اتوقف لما الإعلانات اتسحبت مش لما الخصوصية انتهكت. والقناة اعتذرت فى البداية وتحت ضغط انسحاب المعلنين. وبعدين كل واحد عرف مقامه. والمحطة رجعت اعتذرت لريهام فى شكل تصريح يشيد بأعمالها الخيرة ووطنيتها، ويؤكد عودة البرنامج ولو بدون إعلانات!
ــ أومال فين التحقيق اللى قالوا فى البيان انهم هيعملوه؟
• يا عم انت قديم قوي! لسه فاكر وعد اتعمل من شهر؟! شوف.. آلية التعامل مع الناس فى مصر تعتمد على حاجتين: النسيان والجهل.
ــ النسيان وفاهمينها.. إوعد وانسى. انما تقصد إيه بالجهل؟
• جهل الناس بحقوقها. الكل شبط فى حكاية الخصوصية علشان موضوع متداول ولإنه بيوجع الطبقة المتوسطة. الجرائم اللى الإعلام بيرتكبها فى حق الغلابة كتير. لكن دول ما لهمش تمن ومفيش حد «ينتفض» لهم، أو حتى يقول إن ما يرتكب فى حقهم جريمة.
ــ تقصد جرائم العنصرية وإهانة السوريين والفلسطينيين؟
• مش ده بس. استضافة أطفال انتهكت براءتهم واستنطاقهم على الهواء جريمة. التحقيق مع متهمين قضاياهم منظورة أمام القضاء جريمة. كل هذا يرتكب فقط فى حق بشر من طبقات شعبية فقيرة لا يحميها أحد ولا ينتفض من أجلها أحد، وسط تجاهل تام من السلطات ومن الإعلاميين الذين نسمع صراخهم لما حد يتوجع من داخل المنظومة.
ــ يعنى مفيش حاجة حلوة خالص؟
• إزاى؟ مصر فيها دايما حاجات حلوة. شفت برنامج المذيعة اللى بتستحمى؟
ــ اللى قدمت برنامجها من البانيو أمام المشاهدين؟ وده إيه الحلو اللى فيه؟ ده عمل غير مهنى بالمرة.
• أختلف معاك. القيم المهنية فى البرنامج عالية جدا. أحسن صوت وأوضح صورة. مش تجيب لى فيديو ضباب وتقولى خالد يوسف!!