أثارت الفنانة مها أحمد، ضجة كبيرة على موقع التواصل الاجتماعي "فيسبوك"، بسبب منشور جاء على حساب منسوب لها، وجهت من خلاله رسالة قوية لنجمين بالوسط الفني لم تذكر اسميهما صراحة، وتحدثت حول كيفية تعاملهما معها رغم كونها ممثلة معروفة، وأبدت سعادتها بما حدث لهما في موسم رمضان الأخير.
وجاء في منشور مها، على فيسبوك، ما يلي: «عوضي على الله دي الجملة اللي دايما بقولها لما اتصدم في أشخاص، الحكاية يا سادة نجمين عملوا مسلسل واتنجمت عليهم بنوته لسه ألف باء تمثيل وأديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم إن طول عمرهم مبيعملوش كده مع أي زميلة لهم أقربها أنا».
وتابعت: «النجم الأولاني بيني وبينه عيش وملح وزمالة رشحت فمسلسل بطولته وكان بيقنعنى بدور ولما وافقت بعتولي دور تاني معرفوش دور متعملوش واحدة مبتدئة المفروض إنه عارف قيمتي الفنية وعارف إنى إضافة له اتهرب مني وموقفش جنبي وباعني رغم إن الكل عارف إني زي اخته (ندل)».
وأضافت: «أما التاني كان في بداياته يتمنى يسلم عليا ويقولي يا أستاذة نزلت من نفسي وقلتله مش هنشتغل مع بعض ما هي الحوجة مرة رد وقالي الدور بينادي صاحبه طبعا محكلكوش قد إيه ندمت نفسي وعشت أسود أيام حياتي عياط واكتئاب وقلت عوضي عليك يارب».
وأكملت :«تمر الأيام والاتنين يعلو ويتجمعوا مع بعض فمسلسل واحد (على عينهم طبعا) ويمثلوا وحش قوى تمثيل الكفار وطلعوا كمان مبيقروش اللي بيمثلوه وربنا يركب عليهم بنوته سنة أولى تمثيل وخبرة ويتحول المسلسل والدعاية الدراما كاملة لصالحها وهما (مخدماتيه للاستاذة)».
واختتمت :«يمهل ولا يهمل ابدؤوا من جديد يا أوفر تمثيل ياللى مبتقروش ياكمبارس جنب النجمة. نصيحة بلاش تتشطروا على اللي كان بينكم وبينهم عيش وملح بلاش تتشطروا على اساتذتكوا. (عوضنا على الله) .يارب متحوجنا لحد حتى ولو كان أقرب الناس لينا».