أعلن المؤلف محمد سيد بشير تضامنه الكامل مع زملائه سعاد القاضي ومحمود وحيد، أصحاب مسلسل "شقة 6"، المصنف بأنه عمل درامي رعب، وتم عرضه مؤخرا على إحدى المنصات، بعد أن غير مخرج المسلسل محمود كامل -وفقا لروايتهما- نهاية المسلسل، مستعينا بكاتب سيناريو آخر.
وكتب بشير، عبر حسابه على فيسبوك: "الحقيقة مش فاهم يعني إيه مخرج وجهة إنتاج تستبيح مشروع مؤلف له حق الحقوق الملكية الفكرية والقانون بيحفظ له الحق ده، ويروحوا يجيبوا حد يكتبه غيره دون الرجوع له.. وكمان بيتكلموا كأن ده حق مكتسب، وكأن فكر وإبداع المؤلف صاحب الفكرة ملوش أي لازمة".
وتابع: "طب لما هو ملوش لازمة اشتريتوا السيناريو منه ليه ولما حضراتكم مبدعين جدا كدة مكتبتوش من البداية أنتم ليه؟.. ويا أستاذ يا مخرج حضرتك ممكن تسمح إن حد يجي يخرج مكانك أو حتى يطلع المنتج النهائي دون الرجوع ليك أو حتى يضيف او يحذف في المشاهد اللي حضرتك صورتها دون علمك؟، أنا واثق إن الإجابة لا وحضرتك هتعتبرها أهانة كبيرة لحقك الأدبي والإبداعي؟".
وطالب زملاءه المؤلفين قائلًا: "محدش يعمل تنازل تاني يا جماعة لجهة إنتاج إلا لما يضمن حقوقة الأدبية في بنود مكتوبه في العقد، ولازم الرقابة على المصنفات تمنع تقديم المؤلف التنازل قبل تصوير العمل، زيه زي المخرج، وأرجو من وزارة الداخلية تغير قواعد استخراج التصريح، إلا بتقديم تنازل المؤلف لأن ده بيسلب حقوقه أثناء التصوير، وبيتم العبث وتحوير العمل الدرامي حسب أهواء المخرج والممثلين".
وقال: "حاجة أخيرة، أعمال كتير بتدمر بسبب العبث في خطوطها الدرامية، واللي بيتحاسب في الآخر هو المؤلف لوحده، دون مرعاة أن المخرج وجهات الأنتاج وراه العبث اللي حصل ده، وهما أول ناس بيتهموا المؤلف، لذا أرفض رفض تام اللي حصل للمؤلف الزميل، ولو العمل مش عجبكم والله كنتم قولتوا من الأول، إحنا آسفين مش هناخده أو تشتروا منه الفكرة فقط، لكن اللي حصل ده مرفوض تماما، أو كنتم اشتريتوا سيناريو جديد من المؤلف اللي كمل وجي يقول حاضر ونعم على أغراضكم وأفكاركم، اللي حصل ده مش شطارة ولا عبقرية، كفاية بقي إهدار حق المؤلف، والله لو تم تغير قانون تقديم تنازل المؤلف قبل التصوير، ما في مخلوق هيقدر يغير حرف إلا بالاتفاق مع المؤلف، والرجوع له، وهتشوفوا مشاريع متكاملة مش مبتورة، لأغراض ملهاش أي علاقة بالدراما، غير إنها أغراض شخصية".
يذكر أن مسلسل "شقة 6" من بطولة روبي وأحمد حاتم وصلاح عبد الله وملك قورة ومحمود البزاوي وحمزة العيلي، ومن إخراج محمود كامل، وتدور أحداث المسلسل حول شقة تحمل رقم 6 في إحدى العمارات التي تعيش فيها فتاة "روبي" مع جيرانها، ويحدث أجواء مرعبة داخل هذه الشقة، يتفاجأ بها سكان العمارة ومن هنا يعيش الجيران أحداث الرعب والخوف.