سلم لى عالسيناوى وأخوه التاكساجاوى - حسام السكرى - بوابة الشروق
الأحد 11 أبريل 2021 9:27 م القاهرة القاهرة 24°

احدث مقالات الكاتب

شارك برأيك

هل تؤيد قرار تدريس اللغة الهيروغليفية بالمدارس؟

سلم لى عالسيناوى وأخوه التاكساجاوى

نشر فى : الأحد 12 يوليه 2015 - 11:30 ص | آخر تحديث : الأحد 12 يوليه 2015 - 11:30 ص

ــ فاضى يا حاج؟ أنا رايح روكسى
ــ اتفضل حضرتك. ألا آخر أخبار سينا إيه؟
ــ الجيش الحمد لله مسيطر وكل يوم بيقتل إرهابيين
ــ دى عالم معندهاش دين. عاوزين من مصر إيه؟!
ــ ربنا يستر يا عم الحاج
ــ والله حضرتك احنا اللى جايبينه لنفسنا. سايبين اللى فى السجون ليه؟ شفت مرسى لما حط إيده على رقبته عشان يغتالوا النائب العام؟
ــ ده بعد الحادثة؟
ــ هم دول يفرق معاهم؟ قبلها.. بعدها.. المهم ان التعليمات تطلع من القفص
ــ الوضع مش سهل يا عم الحاج. لو انت اللى سايق تعمل إيه؟
ــ (ينظر بريبة).. حضرتك شايف حد غيرى سايق؟! سلامة الشوف!
ــ أقصد لو انت اللى سايق البلد يا عم الحاج..
ــ ودى عايزة كلام؟! كل اللى فى السجون يتعدموا.. كفاية دلع. بس قبلها نجيبهم واحد واحد ونسأل: مين اللى مسلطك على مصر؟.. ما قالشى، تضربه بالرصاص فى ركبته اليمين، وبعدين ركبته الشمال. انطق.. مين اللى مسلطك؟.. اقطع له إيده لو ما جاوبش. وبعد ما تقطع إيديه تقطع رجله. إيه رأيك؟ (نظرة متسائلة)
ــ مش ضربت رجله بالرصاص فى الأول يا عم الحاج؟!
ــ كان فى الأول.. وبعدين نقطعه خالص.. وفى الآخر نغطس راسه فى المية.. مالك يا بيه؟ انت عيان؟
ــ هو فاضل كتير على روكسى؟! الطريق واقف. انا هانزل
ــ يا بيه الطريق فاتح.. رمضان كريم (يدوس بنزين).. عارف المشكلة فين؟.. فى سينا. لازم ننضفها تماما.. ناخدها متوضية.. أهل سينا دول لازم.. نـ.. نـ..
ــ نهجرهم؟
ــ يا بيه نهجر مين وفين؟
ــ شفت خبير استراتيجى فى التليفزيون بيقول نهجرهم زى ما عملنا مع أهل القنال أيام الحرب مع إسرائيل. نطهر سينا وبعدين نرجعهم
ــ (ينظر باحتقار) باين عليك راجل طيب. رمضان كريم يا بيه.. نغير الموضوع أحسن.. (يصمت ثم ينفجر صارخا) عاوز تطلع الإرهاب من سينا وتجيبه مصر؟
ــ أنا باتكلم عن أهل سينا مش الإرهابيين
ــ يا بيه هو إيه الفرق؟
ــ بين الإرهابيين وأهل سينا؟
ــ آه.. هو الإرهابى مكتوب عليه؟ كلهم شكل بعض. لو جبت لك عشرة من سينا نصهم إرهابيين، مش هتفرق ده من ده؟ القصة دى ما تتحلش إلا بالطيارات.. تدكها باللى فيها.. (يتفرس فى وجهى بريبة) أظن بقى هتقول لى حقوق إنسان وحقوق حيوان وحقوق جماد! أصل الإعلام والصحافة دول بوظوا دماغ الناس. كويس انهم هيظبطوا الصحفيين بالقانون.. تعرف انا عاوز اعمل إيه فى الصحفيين دول؟
ــ بقول لك إيه يا عم الحاج.. مش اللى جاى على اليمين ده ملك المنجة؟ انا عاوز اشرب منجة.
ــ هو حضرتك لا مؤاخذة نسيت الصيام؟ رمضان كريم
ــ المقلة اللى بعده بيقولوا كويسة قوى. نزلنى اجيب لب اتسلى بيه بعد الفطار
ــ مقلة روكسى احسن ميت مرة. انت مش رايح هناك؟!
ــ طب بص.. انا نسيت حاجة مهمة.. خد حسابك كإنك وديتنى روكسى ونزلنى عالناصية
ــ يابيه استنى الباقى.. يا بيه على مهلك.. المدفع لسه عليه كتير.. مع السلامة يا راجل يا طيب.. رمضان كريم

التعليقات