كلام ما قبل الكلام - حسام السكرى - بوابة الشروق
الأحد 15 ديسمبر 2019 5:41 م القاهرة القاهرة 24°

احدث مقالات الكاتب

شارك برأيك

هل توافق على سن قانون جديد لمكافحة الشائعات وتشديد عقوبة مروجيها؟

كلام ما قبل الكلام

نشر فى : السبت 14 سبتمبر 2019 - 10:15 م | آخر تحديث : السبت 14 سبتمبر 2019 - 10:15 م

- مش مصدق انك بالجمود الفكري ده!

- مش فاهم!

- متحجر ومتمسك برأيك

- غريبة! مش انت برضه متمسك برأيك؟ الموضوع بسيط. احنا الاتنين مختلفين وما وصلناش لاتفاق.

- بس انت فاكر دايما انك صح.

- عادي. ما دام قلت لك رأيي يبقى أنا متصور إني صح.

- انت خلاص احتكرت الحقيقة لنفسك؟

- إطلاقا. انا عارف إن قناعاتي بتنطلق من خبرتي وخلفياتي وحاجات كتير ذاتية وبالتالي ممكن اكون غلطان.

- وقعت يا بطل. اشمعنى تتهمني أحيانا باحتكار الحقيقة؟

- فقط لما تقولي ان كلامك مش رأي لكن "كلام ربنا"، أو "متفق عليه"، أو "ثوابت" لا تحتمل آراء. بتكون محاولة لإضفاء حصانة على رأيك وتحويله لمطلق ومقدس إلهي.

- يعني نسيب كلام ربنا عشان خاطرك؟!

- إطلاقا. لكن لو عاوز تستند لنص مقدس، قول إن عندك رأي مبني على فهم لكلام ربنا. ما تدخلش في نقاش وتقول "ده مش كلاااامي".. "ده كلام ربنا".

- عجايب! يعني أجيبلك آية من القرآن واقولك ده كلامي انا؟!

- لما تستند لآية من القرآن في سياق نقاش يبقى انت بتقول ضمنا "أنا فهمي للآية دي إجابة على السؤال المطروح في نقاشنا". ده معناه إن عقلك البشري اختار آية يفترض انطباق تفسيرها على ظروف وملابسات الموضوع المطروح. وبالتالي نحن لسنا في خانة المطلق ولكن في خانة النسبي الإنساني القابل للتعديل والخطأ والصواب والنقاش بحسن نية ودون إرهاب أو تهديد مبطن بتكفير من يخالفك.

- انت عاوزها سايبة عشان تقول أي حاجة وخلاص. فيه كلام بتكتبه ينفعش يتقال أصلا

- ليه؟

- آراءك كتير منها مش صح.

- ما يجراش حاجة إن ده يكون رأيك في رأيي. في النهاية هو رأيي ومن حقي أقوله. زي حقك تقول إنه مش مظبوط أو تعارضه برأي تاني.

- يعني أي حد يقول أي حاجة كده وخلاص؟!

- بالضبط كده. دي حرية التعبير. أي حد ممكن يقول أي حاجة

- بس فيه ناس بتقول كلام فارغ

- أكيد فيه ناس هتقول كلام انت شايفه كلام فارغ

- لأ.. مش انا بس.. فيه ناس كتير شايفينه كلام فارغ

- من حقى اقول رأيي حتى لو كل الناس شايفاه كلام فارغ.

- لأ طبعا. ممكن تضر المجتمع

- ازاي؟

- فيه ناس ممكن تمشي وراه

- لو ناس كتير شايفينه كلام فارغ يمشوا وراه ليه؟

- بلاغة التعبير ممكن تضلل العامة

- مشكلة حلها بسيط. طور قدرتك في التعبير علشان تجذب الناس بدل ما تطور قدرتك في القمع عشان تمنع المختلفين معاك.

- واسيب الناس تنخدع بأي رأي تافه حقير؟!

- ممكن تشوفه حقير لكن مش من حقك تحجبه. ولو حد حاول يقمعك عشان شايف رأيك تافه، هاقوله نفس الكلام

- في حاجات ما ينفعش نسيبها تتقال.

- مثلا؟

- الجهر بالمعصية؟

- لو مفيش تحريض على الكراهية أو العنصرية أو الطائفية أو العنف، يبقى مش من حق حد يحجب رأي أو يمنع صاحبه من التعبير.

- مش فارق معاك حد ينشر أفكار منحلة أو شاذة أو منحطة؟

- يفرق معايا نشر الكراهية أو العنصرية أوالطائفية. دي حاجات بتحط من قدر الإنسان. غير كده عبر براحتك.

- ما ينفعش نسمح ان الكلام ينزل تحت مستوى معين.

- مين يحدده؟

- المختصين والعلماء المعتبرين

- قصدك الأشخاص اللي بتعتبرهم علماء معتبرين ورأيهم زي رأيك؟

- أنا باخد رأيي منهم

- وانت مش مؤهل تفكر بنفسك ويكون لك رأي؟

- هم دارسين ومؤهلين اكتر مني

- مش كنت تقول من الصبح علشان ما اضيعش وقتي واتناقش مع حد شايف انه غير مؤهل للنقاش؟!

التعليقات