من زمن الأهرام والأخبار إلى زمن الانهيار العصبى! - احمد سعيد - بوابة الشروق
الأربعاء 18 نوفمبر 2026 7:22 م القاهرة

احدث مقالات الكاتب

شارك برأيك

ما توقعاتك لمباراة مصر ومالاوي؟

من زمن الأهرام والأخبار إلى زمن الانهيار العصبى!

نشر فى : الأربعاء 18 نوفمبر 2026 - 7:00 م | آخر تحديث : الأربعاء 18 نوفمبر 2026 - 7:00 م

أنا من جيل كان بيصحى الصبح يجيب جورنال الأهرام والأخبار، ويقعد ياكل له لقمة قبل ما ينزل الشغل، ويتصفح العناوين الرئيسية، ويبص على صفحة الرياضة ونتايج الماتشات، ويقرأ مقال لأنيس منصور أو هيكل أو غيرهم! ويشوف التليفزيون هيعرض إيه بالليل. فيلم عربى؟ ولا «اخترنا لك»؟ ولا حفلة أضواء المدينة وعبدالحليم! وخلاص على كده! كفاية أخبار لحد بكرة!
أنزل الشغل، أخلص، أروح النادى، أقعد مع أصحابى، أتعشى، وأرجع البيت أنام. ولو حصل انقلاب فى نيجيريا، أو حرب أهلية فى بلد ما أعرفش مكانها على الخريطة، أو رئيس اتقتل فى أمريكا الجنوبية، ما كنتش أعرف إلا تانى يوم الصبح، ويمكن بعد يومين لو الخبر ما كانش مهم كفاية عشان يتحط فى الصفحة الأولى! والغريب إن الدنيا كانت ماشية، والحروب بتحصل، والرؤساء بيموتوا، والحكومات بتقع، وأنا نايم زى الفل، ومش حاسس إنى مقصر فى واجباتى تجاه البشرية!
أما دلوقتى، فالموضوع اتحول لكارثة! بقيت أنام وأنا قلقان، وأصحى كل ساعتين تلاتة، وأول ما أفتح عينى أمسك التليفون، وكأنى مسئول عن الأمن القومى للكوكب كله! أبدأ بمصر، ألاقى مصيبة. أروح لبنان، ألاقى أزمة. أعدى على إيران، ألاقى تهديدات. أبص على روسيا وأوكرانيا، ألاقى حرب. أروح أمريكا، ألاقى ترامب قال تصريح هيقلب العالم. أفتح أخبار الخليج، ألاقى صراع جديد. أقول أهرب شوية على إفريقيا، ألاقى انقلاب فى النيجر ومذبحة فى نيجيريا. أروح الفلبين، ألاقى إعصار. أقول أشوف الرياضة يمكن أهدى، ألاقى فضيحة تحكيمية، ومدرب اتطرد، ولعيب اتخانق مع مراته! وأنا مالى يا جماعة؟! هو أنا الأمين العام للأمم المتحدة وما حدش قالى؟!
والمصيبة إنك كل ما تقرأ خبر تلاقى تحته عشرة تحليلات، وخمسين تعليق، وألف واحد بيأكدوا إن اللى حصل ده مجرد بداية، وإن المصيبة الحقيقية لسه جاية! ولو قررت تتأكد من الخبر، تكتشف إن فيه عشرين رواية مختلفة، وكل واحد عنده مصادر «موثوقة للغاية»، وفى النهاية تقفل التليفون وأنت مش عارف مين ضرب مين، ومين مات، ومين لسه عايش، ومين كسب الحرب اللى أصلًا ما كنتش تعرف إنها بدأت!
زمان كنت بقرأ الجورنال عشان أعرف أخبار العالم. دلوقتى بقيت محتاج إجازة من العالم عشان أعرف أنام!
والأجمل إن وكالات الأنباء والمواقع الإخبارية عندها حساسية غريبة من الأخبار الحلوة. عمرك شفت عنوان عاجل بيقول: «الشمس أشرقت النهارده على معظم أنحاء العالم، وملايين البشر صحوا بصحة جيدة، وأطفال راحوا مدارسهم ورجعوا بسلام»؟ مستحيل! لازم العنوان يبدأ بـ«كارثة»، أو «عاجل»، أو «العالم على حافة الهاوية»، أو «تطور خطير ينذر بالأسوأ»! حتى لو ما فيش مصيبة حصلت، يجيبوا لك خبير استراتيجى يشرح لك المصيبة اللى ممكن تحصل!
والنتيجة إن الواحد بقى شايل هموم سبعة مليار بنى آدم، وهو أصلًا مش عارف يحل مشاكله الشخصية!
والأغرب إننا زمان كنا بنشتكى إن المعلومات قليلة، وإن الإعلام بيخبى علينا الحقيقة. دلوقتى بقينا غرقانين فى المعلومات لدرجة إن الحقيقة نفسها غرقت ومحدش عارف يطلعها! زمان كنا بنعرف أخبار العالم مرة كل 24 ساعة، ونعيش حياتنا بقية اليوم. دلوقتى بنعرف أخبار العالم كل 24 ثانية، ومبقاش عندنا وقت نعيش حياتنا!
أنا مش بقول إن زمان كان أحسن فى كل حاجة، ولا إن الجهل نعمة. لكن يبدو إن فيه فرق كبير بين إنك تكون إنسان مثقف ومتابع لما يجرى حولك، وبين إنك تتحول لمندوب مراسلين بلا حدود، شغال ورديات ليل ونهار، ومن غير مرتب!
والحقيقة إنى بقيت مقتنع إن من أعظم الاختراعات اللى عرفتها البشرية مش الإنترنت ولا الذكاء الاصطناعى.. ده الجورنال الورق اللى كان بيخلص عند صفحة الوفيات والأبراج، وتقفله وتحطه على جنب، وتكمل يومك!
يا ريت حد يخترع لنا تكنولوجيا جديدة اسمها «كفاية أخبار النهاردة».. نضغط على زرار، فالعالم كله يسكت لحد بكرة الصبح!
وسؤالى بقى: إحنا زمان كنا عايشين فى نعيم الجهل، ولا دلوقتى عايشين فى جحيم المعرفة؟!

احمد سعيد رئيس حزب المصريين الأحرار
التعليقات