النفسية.. مع د. محمد طه : اضطراب المسلك - محمد طه - بوابة الشروق
الإثنين 2 أغسطس 2021 6:56 ص القاهرة القاهرة 24°

احدث مقالات الكاتب

شارك برأيك

ما مدى رضاك عن أداء المنتخب الأوليمبي بعد الخروج من ربع نهائي أولمبياد طوكيو؟


النفسية.. مع د. محمد طه : اضطراب المسلك

نشر فى : السبت 12 يونيو 2021 - 7:50 م | آخر تحديث : الأحد 13 يونيو 2021 - 10:18 ص

فيه مرض نفسى معروف بيصيب بعض الأطفال والمراهقين اسمه «اضطراب المسلك / السلوك»..Conduct Disorder.. وبيصيب الأولاد أكتر من البنات (٤ – ١٢% فى الأولاد و٢ – ٩% فى البنات).
فى المرض ده.. الطفل بيكون عدوانى بدرجة كبيرة.. يتعصب ويتنرفز على أبوه وأمه وأخواته.. ممكن يمد إيده عليهم.. يدخل فى خناقات ومشاكل كتير مع أى حد وكل حد.. ممكن يؤذى حد.. يتنمر على حد.. يغلس ويرخم على حد.. يخوف حد.. حتى الحيوانات ماتسلمش منه.
بيكون كمان طفل مخرب.. يعنى يكسر.. يحرق.. يبوظ أى حاجة تطولها إيده.
بيكون برضه مخادع.. يعنى يكدب.. يسرق.. يقتحم البيوت والمحال وغيرها.
وكمان بيخترق كل القوانين والقواعد المجتمعية.. يهرب من المدرسة.. يعمل مقالب.. لا يحترم الآخرين على الإطلاق.. ويتعدى على حقوقهم بشكل دائم.
كل الأطفال بيتعصبوا أحيانا.. بيعندوا أحيانا.. بيكسروا ويبوظوا أحيانا.. لكن الطفل ده موضوع تانى.
الطفل ده بيكون مطلع عين أبوه وأمه حرفيا.. عنيد لأقصى درجة.. مش بيسمع أى كلام.. يتحداهم ويتحدى توجيهاتهم.. يقاومهم ويرفض طلباتهم.. 24 ساعة.. 7 أيام فى الأسبوع.
بيكونوا مش عارفين يعملوا معاه إيه.. كل طاقتهم خلصانة معاه.. يحاوطوا عليه من هنا.. يعمل مشكلة من هنا.. يعاقبوه من هنا.. يورطهم هناك.
الناس بتفتكر إن الولد ده مش متربى.. أو متدلع.. أو أهله مهملينه.. رغم إن الأهل بيكونوا فى أوقات كتير فى منتهى الأدب والاحترام.. لدرجة أنهم هما نفسهم بيشكوا فى نفسهم، ويحسوا بالتقصير والذنب.. ويروحوا لدكتور ورا دكتور يقولوله نعمل إيه؟ نربيه إزاى؟ احنا قصرنا فى إيه؟
الطفل ده مريض.. ومرضه له أسباب.. منها وجود تلف عضوى أو وظيفى بالمخ.. استعداد جينى.. صدمات نفسية عنيفة.
وبعض الأطفال بيكون معاهم ــ كمان ــ اضطراب نقص الانتباه وفرط الحركة ADHD، أو اضطراب التحدى المعارض ODD فى نفس الوقت.. وده يزود الأمور صعوبة فوق صعوبتها.
الطفل اللى زى ده محتاج علاج (دوائى أو نفسى أو الاتنين مع بعض).. وتقويم / تعديل سلوكى.. ورعاية وتفهم شديدين.
الأهل كمان بيكونوا محتاجين دعم.. ومساعدة.. وتوعية.
الأبحاث الحديثة وجدت أن نسبة كبيرة من الأطفال المصابين باضطراب السلوك ممكن يتعافوا ويخفوا ويتغيروا كويس جدا بالخطوات التشخيصية والعلاجية السليمة.. والتقويم السلوكى المدروس.
ولو ده ماحصلش.. فالأطفال دول بيتحولوا بخطوات ثابتة إلى شخصيات سيكوباثية شديدة الصعوبة لما يكبروا.
ودى قصة تانى خالص.


محمد طه أستاذ مساعد الطب النفسي بكلية طب المنيا
التعليقات